Монголын урлагийн акулууд шинэ, залуу уран бүтээлчдийг продюсерлэн гаргаж ирдэг ч хэдэн жилийн дараа эргээд хэл аманд орж, “хөгшин, залуугийн тэмцэл” өрнөдөг жишиг тогтоод уджээ. Залуус урлагийн тогоонд чанагдахдаа продюсерүүдийнхээ дарамтанд яаж зовж, зүдэрдэг тухайгаа хамгийн анх дэлгэсэн хүнийг “New Star” продакшнаас гарч ирсэн ВХ дэлгэсэн гэхэд хилстэхгүй. Түүнээс хойш хэчнээн ч залуу уран бүтээлч зовлонгоо түмэн олондоо уудалсныг тоолбол гарын арван хуруунаас лав илүү гарна. Продюсерлагч студи болон уран бүтээлчдийн ийм маргаан гол төлөв орлогын хувь, “өгөө аваа”-наасаа л үүддэг.

Гэтэл дуучин И.Мишээл продюсертаа зарцлагддаг гэсэн утгатай постыг сошиал хуудсандаа өчигдөр оруулж, Б.Чинбат, Ц.Сарнай, тэр гурвын хооронд хэрүүлийн алим ургаад байна. Дуучин бүсгүйн постноос харахад тэр гэрийн үйлчлэгч, орлогын эх үүсвэр, хүүхэд асрагч, цэвэрлэгч гээд л янз бүрээр ашиглуулж, амьдралынхаа хайран сайхан 7, 8 жилийг үрэн таран хийлээ. Сэтгэл санаа, мөнгө төгрөгөөрөө хохирч хамтран ажиллахаа больсон гэж байв. Продюсер Б.Чинбат зохиож өгсөн дөрвөн дуугаа цацахыг хориглож, бараг л хурааж авсан гэх зүйл бичсэнээс гадна танихгүй эрэгтэй хүнтэй уулзуулаад орхиж, зугтаж явсан гэх мэт ноцтой зүйлсийг ч цухуйлгажээ. Харин Б.Чинбат, Ц.Сарнай нарын зүгээс хэвлэлд өгсөн хариу мэдэгдэлдээ И.Мишээлийн ярьсан шиг тийм зүйл огт байхгүй. Харин ч дуучин бүсгүй клипэндээ дургүй гэх шалтгаанаар дуунуудаа устгасан гэх тайлбар өгчээ.

Өмнө нь гарч байсан мэдээллүүдээс харахад Монголын продюсерууд уран бүтээлчдийнхээ орлогоос 90%-ийг нь авдаг, бусад уран бүтээлчидтэй хамтрах боломж, бололцоог нь хааж, чөлөөтэй уран бүтээл туурвих зүтгэлийг нь хойш татдаг.

Тэгвэл гадаадын студи, продюсер, уран бүтээлчдийн байгуулдаг хамтран ажиллах гэрээнээс харахад гэрээлэгч талуудын тохиролцооноос хамаараад тухайн уран бүтээлч СD-ний борлуулалтаас 15%, дижитал борлуулалтаас 25%, тухайн уран бүтээлийг бусдад ашиглуулах, өөрийн биеэр тайзан дээр гарч дуулах зэрэгт ашгийн 50%-ийг авдаг журамтай юм байна. Гэхдээ энэ хувилсан тохиролцоо нь байж болох хамгийн доод хэмжээнд гэдгийг анхаарах хэрэгтэй. Үүн дээр нэмээд уран бүтээлч, продюсер хоёр хамтран ажиллах хугацаагаа тохиролцоод нийт хөлсөө тогтсоны дараа продюсерийн зүгээс уран бүтээлчид урьдчилгаа төлбөр өгөөд гэрээ дуусгавар болоход үлдсэн төлбөрийг олгодог журамтай. 

Урлагийн хөшигний ард олон янзын зөрчил үүсэж байдаг нь ойлгомжтой ч гэлээ ах, эгч нар нь “Урлаг угаасаа ийм байдаг” гэдэг үгээр шинэ залуусынхаа амыг тагладгаа л болчихмоор юм биш үү дээ?!

Үе, үе дэгдэх иймэрхүү мөнгө төгрөг, уран бүтээлийн эрхтэй холбоотой маргаануудыг харахад хөгжмийн продюсер Рагу Раман Монголоос явахдаа хэлсэн үг өөрийн эрхгүй санаанд орж ирнэ. Тэрбээр явахаасаа өмнө “Монголд урлагийн мафийн нөлөө маш их байна шүү!” гэж толгой сэгсрэн байж хэлээд урлагийнхны олон олиггүй үйлдлийн талаар ярьсан билээ. Тэгэхээр түүний хэлсэнчлэн Монголын урлаг олиггүй хэвээрээ л үлдэж дээ, янз нь!