Санаж байна уу, та нар. Сайдын сэтэр нь солигдож өөр сэтэртэй болсон нэгэн сайд шүгэл үлээж, хүүхдээ хамгаал гэж байсныг. Та санасан бол Х.Булгантуяа сайд одоогоос яг жилийн өмнө Төрийн ордонд шүгэлдэж  байв даа. Харамсалтай нь шүглийнх нь дууг хэн ч сонсоогүй. Сонсоогүй гэдэг нь сонсогдоогүй гэсэн үг биш. Хоржоонтой нь шүгэлдээд удаагүй байхдаа Хөдөлмөр, нийгмийн хамгааллын сайд болоод өөр тийшээ яваад өгсөн.

Явж ирчихээд хүүхдийн эрх, хамгааллын төлөө дугарна гэж бодтол үгүй байж. Ордонд үлээсэн шүглийнхээ дуутай адил замхрав. Энэ хооронд хүүхдэд хохирол учруулсан гэмт хэргийн тоо 2023 онд 3430 бол өмнөх оныхоос 17.9% өсөв. Тэр дундаа хүүхдийн эрүүл мэндэд хохирол учруулсан хэрэг 955, бэлгийн хүчирхийллийн хэрэг 904 бүртгэгджээ. Тоо худал хэлдэггүй гэх үгтэй. Хамгийн сүүлд Сэлэнгэ аймгийн цагдаагийн газрын дөрвөн алба хаагч эмэгтэй хүүхэд хүчирхийлж байсан нь нийтэд ил болов. Цагдаа таныг хамгаална гэх айхтар сүрхий уриатай цагдаагийн байгууллага дотроо сэртхийлгэсэн  хэрэг гарах нь тэр. Олон нийт үүнд анхаарлаа хандуулахыг шаардаж, цахим хуудсаар нийтийг уриалж байх хооронд энэ талаар дугарах ёстой Хөдөлмөр, нийгмийн хамгааллын сайд таг.

Өнгөрсөн 2023 оны 10-р сард Дорноговь аймгийн Сайншанд суманд 12 настай охиныг эрүүгийн элемент хэрцгийгээр хороосон хэрэг гараад олон нийт шуугьж байхад асуудал эрхэлсэн сайд нь бас л таг байсан. Хэдий болтол таг байж, хэдэн хүүхэд хохирч байж, хүчирхийлэл хэр хэмжээнд тултал өсөж байж дугарах сайд вэ...

“Энэ шүгэл  бол тусламж дуудах хамгийн энгийн хэрэгсэл юм. Тийм учраас эцэг, эхчүүдийг хүүхдүүддээ энэ хүүхэд хамгааллын шүглийг авч өгч дадаарай гэж уриалж байна. Мөн хэрвээ хүүхэд шүгэлдвэл очиж, тусалдаг, хамгаалдаг байгаарай. Энэ ажлыг бид Баянзүрх дүүргийн сургуулиудаас эхэлж байна”

Энэ бол Х.Булгантуяа сайд таны хэлсэн үг. Хэзээ эхэлж, хаана явж байна тэр үр дүн. Хүүхэд хамгаалал гэхээр яагаад таг дуугүй байдаг юм бол. Эмэгтэй гишүүн гэдэг утгаар, эрхэлсэн асуудлынх нь сайдын хувиар яагаад ганц үг ган хийчихэж чадахгүй байна. Таныг загнадаг У.Хүрэлсүх Ерөнхийлөгч, гүйцэтгэх засаглалын тэргүүн байхдаа амаржаад удаагүй эх “таавчигтай” гудманд гарахад л огцорч байсан юм шүү.