ЕБС, их сургуулийн орчинд сурагч, оюутнууд нэгнээ дээрэлхдэг хэрэг үе, үе чих дэлсдэг. Манай олны танил алдартнууд сурагч, оюутан ахуйдаа бусдыг хэрхэн дээрэлхдэг байснаараа сайрхаж, “Атаман явлаа” гэж онгирдог бол гадны зарим оронд олон жилийн өмнөх хэргийг ч сөхөж, дээрэлхүү зангийнх нь шанг чангахан хүртээж, ажил мэргэжлийн замналд нь цэг тавих тохиолдол их.

Ан Ү Жин, И Жэ Ён, И Да Ён, Ким Га-Рам, Нам Жү Хёг, Жи Ён. Тэд бол өсвөр наснаасаа дээрэлхүү загнаж, муухай аашилснаасаа болж, багаасаа, хамтлагаасаа хөөгдөж, гудамжинд гарсан Өмнөд Солонгосын урлаг, спортын одод. Тэр хэрээрээ дээрэлхүү нэр зүүж, хамгийн хүчтэй хэл аманд өртсөн хүмүүс. Тэдгээрээс хамгийн их анхаарал татсан, бүр дэлхий дахинаа зард гарсан хоёр нь И Жэ Ён, И Да Ён. БНСУ-ын эмэгтэйчүүдийн гар бөмбөгийн шигшээ багийн ихэр од. Бүхэл бүтэн улсынхаа гар бөмбөгийн ирээдүйг авч явах “Олимпийн найдвар” гэгдэж явлаа, тэд. Дээрэлхүү хэргийн хохирогчид сошиал сүлжээгээр дамжуулан зовлонгоо ярих нь сүүлийн жилүүдэд Өмнөд Солонгост элбэг үзэгдэл болоод байна. Жа Ён, Да Ён хоёр дунд сургуульд байхаасаа ангийнхаа охидоо өгсүүлээд өмнүүр нь хөндөлссөн ямар ч хүүхдийг алгадах, дарамтлах, элэгдэх, гутаан доромжлох гээд есөн шидээр зовоож, багын зангаа ч тавилгүй багийнхаа гишүүдийг гар хөлийн үзүүрт зарахаас авахуулаад хурууныхаа чилээг хүссэн үедээ гаргачихдаг байжээ.

Сүүлийн үед Өмнөд Солонгосын урлаг, спортынхон хууль байгууллагууд ч тэр, шүтэн бишрэгчид ч тэр нэгэн цагт хүндэлж явсан хүмүүстээ хэтэрхий хатуу хандаж байгааг шүүмжилж эхэлснийг дурдахгүй өнгөрч болохгүй байх.

Дээрэлхүү “атаман”-уудын хэрэг дэлхийн өнцөг булан бүрд үеийн, үед гарсаар ирсэн бөгөөд хожим хатуухан хариуцлага тооцдогоороо өмнөд солонгосчууд ийнхүү алдаршаад буй. Тэгвэл бусад улс оронд энэ асуудлыг хэр нухацтай авч үздэг бол?

Алдарт дуучин Адель хүртэл дээрэлхүү сурагч охин байжээ. Түүний дарангуйллын тухай аман домог зөндөө бий гэнэ. Нэг жишээ татахад, Адель ахлах ангид байхдаа өөрийнх үзэх дуртай зурагтын цувралд дургүй гэх шалтгаанаар нөгөө ангийнхаа охиныг дэглэж, багш нарын хурлаар орж байжээ.

За, тэгээд Хилтоны гэр бүлийн шуугианы домог Парис Хилтон байна. Загвар өмсөгч, жүжигчин, дуучин гээд бүхий л салбарт тодорч явсан тэр сургуулийнхаа “Хатан хаан” бөгөөд баян гэр айлын эрх охин, төрөлхийн сэхүүн зантай Парис үеийнхээ сурагчдыг ёстой л хашрааж тавьдаг этгээд байж гэнэ. Гэхдээ тэр солонгос одод шиг багын дээрэлхүү зангаасаа бус алдартны бодлогогүй үйлдэл, замбараагүй “явдал”-аасаа болж, замналаа төгсгөсөн юм л даа.

2010 оны эхээр дэлхийн сая, сая хүний шүтээн болсон дуучин Деми Ловатог манай уншигчид ч бас танина. Уянгалаг хоолойгоороо түмнийг байлдан дагуулдаг тэр дуулдаг шигээ сайхан ааштай биш аж. Дунд сургуульд байхаасаа “атаман” зангаараа алдаршиж, ахлах сургуулиа дүүргэтлээ сургуулиа базжээ.

За, ер нь хорвоогийн алдартнуудын хэн нь дээрэлхүүг ухвал энэ хэдхэн хүнээр тогтохооргүй олон. Дурдаад л байвал дурдаад л байна.
Улс, улсын алдартнуудын хов жив, дуулиан шуугианд чих тавьжээ суухад тухайн нутаг орныхоо соёл, уламжлалын ялгаагаар дээлэрхүүчүүдэд өөр, өөр ханддаг нь ажиглагдана. Азийн ихэнх оронд, Өмнөд Солонгосоос бусад гэхэд ч хилстэхгүй, тэд аль диван гарт болж өнгөрсөн явдалыг сөхөх нь ховор бөгөөд нэр алдар, ажил мэргэжлийг нь сүйрүүлэх хэмжээнд нэгнийгээ адладаггүй бололтой юм.