ТикТок АНУ дахь үйл ажиллагаагаа бүрэн зогсоосон ч ердөө 12-хон цагийн дараа юу ч болоогүй юм шиг дахин ажиллаж эхэлжээ. Уг аппликейшнийн аргаа барсан хэрэглэгчид РедНөүт зэрэг бусад аппликейшн нь рүү шилжиж байсан бол өнөөдрийн байдлаар хэвийн горимдоо орсон удахгүй Ерөнхийлөгчийн тангараг өргөх Дональд Трампын “ТикТокыг аварна” гэсэн амлалт биелснийх гэж дэлхийн хэвлэлүүдээр онцлон мэдээлж байна.

ТикТок компани АНУ-д дахин ажиллаж эхлэхдээ “Та бүгдийн тэвчээр, дэмжлэгт талархъя. Ерөнхийлөгч Д.Трампын хичээл зүтгэлээр ТикТок АНУ-д дахин ажиллаж эхэллээ.” гэсэн мэдэгдлийг бүх хэрэглэгчдээ явуулжээ.

Учир нь, Дональд Трамп даваа гарагт тангараг өргөмөгцөө хамгийн түрүүнд хийх ажил нь ТикТокт хориг тавьсан хууль хэрэгжих хугацааг хойшлуулна гэж ням гарагийн өглөө мэдэгдсэн нь ийнхүү биелэлээ олжээ. АНУ-ын хэмжээнд 170 сая хүн ТикТок аппликейшнийг тогтмол хэрэглэдэг байна.