Уншигч та нэг зүйл анзаарав уу? Аудит шинэ жилийг үрэлгэн баяр гэж үгүйсгэснийг. Төв талбайд иргэд баярлахыг үрэлгэн гэж үзсэнийг. Энэ дэлхийн соёлт нийгэмд нийтээр тэмдэглэх баярыг хөндлөнгөөс аудиталсан анхны улс нь Монгол Улс болж байх шиг. Ер нь комминустууд баяр, хөөрт дургүй юм билээ. Октябрын хувьсгалын үр дүнгээр засаг атгасан большевикууд баярыг ихээхэн цээрлэж 1929 оноос зул сарын баярыг хуучин нийгмийн хог, шашны мунхруулга гэж үзэн хориглов. Ёолкыг ёолуулсан анхны тохиолдол гэвэл энэ. Ердөө үүнээс арваадхан жилийн дараа өнөө бидний мэдэх ёолк гэгчийн араг яс босоод өнөө цагтай учран золгожээ.

Нийтлэлийн гол агуулга “ёолк” биш учраас одоо гол асуудалдаа оръё. Нийслэлчүүдийн ирэх оны төсвийн орлого 3.3 их наяд төгрөг. Үүнээс “шинэ жилийн баярын цэнгүүн”-ийг зохион байгуулах 400 сая төгрөгийг тэвчиж болох зардал гэж үзжээ. Шинжээчийн хэлснээр “нотлох баримтаар зориулалт тодорхойгүй байна” гэж дүгнэсэн байгаа юм. Хүн амын тал нь төвлөрсөн, төвлрөхийн хэрээр асуудал нь ч том энэ хотод бүх баярыг нь авчихъя. Аваад ард түмэнд юу үлдэхэв бөөн асуудал бухимдал, гомдол, цөхрөл л үлдэнэ. Тэртээ тэргүй асуудалтай хотод гялайж гялтайх нь байг гэхэд ядахдаа баярыг нь ард түмэнд үлдээ л дээ. Төв талбай баярлаж болдоггүй талбай юм бол урин цагтай зэрэгцээд “дэлгэрдэг” цагаан асаруудаа яах болж байна. Хаврын шороотой нийлээд талбай дээрээ ном, ногоо, идээ будаа зарж Төв талбайгаа Нарантуул шиг болгох гэж байгаа юм уу?!

Бүр эсвэл улс төрийн ёолсон замналынхаа өсийг авах Д.Загджавын санаархал ч цухалдаж байх шиг. Тэрээр 1985 онд Нийгмийг аюулаас хамгаалах яамны Цэргийн дээд сургууль төгсжээ. Тэндээ баяр бол хуучин нийгмийн үлдэгдэл гэх социалист итгэл соёолсон байж болно. Үүнээс хойших түүний намтар хайлтын систем дээр ярайтал дугаарлан буй. Анх 2008 онд УИХ-ын гишүүн болох намын анд Д.Идэвхтэний саналыг будилаантуулсан гэж шуугьж байсан ч тэгсгээд намжсан. Ордон орох түүний санаархал олон байсан ч үндсэндээ дээрх шуугианаас болж замхарсан нь ийм. Гэхдээ байна аа, дарга болж сэтэрлэх заяа нь бол замхраагүй. Сонин болгоход Энхтайван, найрамдлын байгууллагын ерөнхийлөгчөөр ажиллаж байв. Манайхан “мүүн” гэж шошго хадсан байгууллага юм шүү дээ. Дараа нь 2017 оны гуравдугаар сард Уул уурхай, хүнд үйлдвэрийн дэд сайдаар томилогдов. Гурван жилийн дараа 2020 оны долоодугаар сард Шүүхийн шийдвэр гүйцэтгэх ерөнхий газрын даргаар томилогдоод, хоёр жилийн дараа Бригадын генерал цол хүртлээ. Сахил хүртээд шал дордсон гэдэг шиг салбарт нь хоригдлууд оргох, саатуулагдаж байсан хүн нас барах, салбарынх нь ажилтан цагдаагийн алба хаагчийн биед халдсан гэх шалтгаанаар 2022 оны 11-р сард албан тушаалаас нь чөлөөлсөн. Генерал болсноосоо хойш гуравхан сарын дараа шүү дээ. Дуулиатайгаар ажлаа өгсөн Д.Загджав яг одоо Монгол Улсын Ерөнхий аудиторын албан тушаалыг хашиж буй. Ерөнхий аудитор өнгөрсөн наймдугаар сард “Улаанбаатар төмөр зам” ХНН-т хийж буй хяналт шалгалтаа “ОХУ Украинд цэргийн тусгай ажиллагаа явуулж байгаа энэ хүнд үед хамтарсан аудит хийж байгаагаараа онцлогтой” гэж ярьж байв. Өөрийгөө ОХУ-ын улстөрч Сергей Мироновтой найз гэж ярьдаг тэрээр “дээдсийн захиасаар” эсвэл дэргэдийн санаагаараа баяр хориглох гээд байдаг ч юм билүү хэн мэдлээ.

Ямар ч байлаа гэсэн нийтээр тэмдэглэх баярт хөндлөнгийн аудит хийсэн анхны аудитын байгууллага нь Монгол Улсын аудит болж таарлаа. Дарга нь Д.Загджав шүү, тогтоогоод аваарай...