Дэлхийн сая, сая хүний үзэх дуртай “Араатны хаан арслан” хүүхэлдэйн киноны Муфаса, домогт “Оддын дайн” киноны хорон санаатан Дарт Вейдер нарын хоолойгоор та бидний сэтгэл зүрхнээ хоногшсон жүжигчин Жеймс Ээрл Жонс 93 насандаа нас баржээ.

Хэдийгээр түүнийг нүүр царайгаар нь төдийлөн олон хүн танихгүй ч дээр дурдсан алдарт дүрүүдийг амилуулсан “бассо профундо” буюу бүдүүн баргил хоолойгоор нь бүгд мэднэ. “Муфасагийн мэргэн ухаан, Дарт Вейдерийн зүрх үхүүлж, айдас хуруулам хоолой чихнээ тун дотноор сонстох шиг санагдана. Орчлон ертөнц дээр түүний давтагдашгүй дуу хоолойг нөхөж баршгүй билээ” хэмээн кино салбарын лидерүүд дурсан санаж басхүү гүн хүндэтгэл үзүүлж байна.

Жэймс Ээрл Жонс нь урлагийн салбарт 60 жил замнахдаа 200 гаруй тайз, дэлгэцийн бүтээлд дүр төрх, дуу хоолойгоо мөнхлөн үлдээсэн билээ.