ОХУ-д энэ сарын 15-17-ны өдрүүдэд болсон Ерөнхийлөгчийн ээлжит сонгуульд одоогийн Ерөнхийлөгч Владимир Путин ялалт байгуулсан тухай ТАСС агентлаг мэдээллээ. Тус агентлагийн мэдээлснээр тэрбээр 87.32% санал авсан байна. ОХУ-ын Сонгуулийн төв хорооны мэдээлж байгаачлан нийт саналын хуудасны 95.08%-г тоолоход дээрх үр дүн гарчээ.

Ийнхүү өдгөө 71 настай Владимир Путин тав дахь бүрэн эрхээ хэрэгжүүлэх боллоо. Ингэснээр орчин цагийн Оросын түүхэнд хамгийн удаан хугацаанд төр барьсан улстөрч болж байна. Энэ удаагийн сонгуульд Коммунист намаас нэр дэвшсэн Николай Харитонов 4.28% санал авч удаалсан бол Шинэ Ардын намаас нэр дэвшсэн Владислав Даванков 3.85%, Либерал ардчилсан намаас нэр дэвшсэн Леонид Слуцкий 3.15% санал авчээ.

Энэ удаагийн сонгуулийг эсэргүүцэж, Владимир Путины засаглалыг эсэргүүцсэн хэд, хэдэн жагсаал цуглаан Оросын өнцөг булан бүрд болсон байна. Английн Телеграф сонины мэдээлж байгаагаар ОХУ-ын 17 хотод эсэргүүцлийн хөдөлгөөн өрнөж, 74 хүнийг баривчилжээ.

Ялалт байгуулах нь тодорхой болсон Владимир Путин москвагийн цагаар 18-ны өдөр нэр дэвшсэн улстөрчидтэй уулзахаар болсон байна.

Эх сурвалж: TACC