Хүн төрөлхтний эв нэгдлийн бэлгэ тэмдэг болсон 2024 оны Парисын зуны Олимпын наадамд боксын төрөлд оролцсон тамирчин Мөнхцэцэгийн Энхжаргал хувийн сошиал хуудсаараа дамжуулан Монголын ард түмэндээ ханджээ: 

Мөнгөнцэцэг овогтой Энхжаргал миний бие нь 2011 оноос эхлэн өнөөдрийг хүртэл боксын спортоор хичээллэж ирсэн бөгөөд энэхүү спорт нь амьдралын минь салшгүй хэсэг болсон билээ. Энэ олон жилийн хүч хөдөлмөр, хичээл зүтгэлийнхээ үр дүнд хүн төрөлхтний эв найрамдлын бэлэг тэмдэг болсон Олимпын наадамд анх удаа оролцож, Монголынхоо ард түмний итгэл найдвар, дэмжлэгээр шантралгүй хичээн зүтгэж, өөрт байх бүхий л нөөц бололцоогоо дайчлан Олимпын алтан медалийг эх орондоо авч ирнэ гэсэн хүсэл зорилго тээсээр явсан. Олимпын их наадамд маш хүнд хоёр тулаанд ялалт байгуулж, медалийн босгон дээр харамсалтайгаар тэмцээнээ өндөрлүүлэх болов.

Энэ ялагдал маань надад ихийг ойлгуулж, ухаарууллаа. Би улам шаргуу зүтгэж бэлтгэл сургуулилтаа эрчимжүүлж, та бүхнийхээ итгэлийг алдахгүй!
Надад итгэл хүлээлгэн дэмжиж байсан Монголынхоо ард түмнээс уучлал хүсэж байна.  

Монголын минь ард түмэн, МБХ-ны удирдлагууд, шигшээ багийн хамт олон, “Алдар” спорт хороо, Зэвсэгт хүчний 065-р анги, “Монгол од” ХХК болон гэр бүл, ах дүү нартаа дахин дахин талархал илэрхийлье.

Монгол гэсэн нэрэн дор нэг зорилго тээн оролцож буй нийт баг, тамирчдадаа алтан соёмбот төрийн далбаагаа олонтоо мандуулахыг хүсье!
МОНГОЛ УЛСЫН ТӨЛӨӨ ЗҮТГЭЕ!