Оросын эрх баригчид Өмнөд Солонгосын иргэн Бак Вон Сон гэгчийг улсын нууцыг тагнуулын албанд задруулсан гэх хэргээр баривчилжээ. ОХУ-ын төрийн мэдлийн ТАСС агентлагийн мэдээлснээр мөрдөн шалгах явцад хэрэг үйлдсэн нь тогтоогдсон тул ийнхүү баривчилсан байна. Өмнөд Солонгосын иргэнийг өнгөрсөн нэгдүгээр сарын эхээр Владивосток хотноо саатуулж, улмаар хэдхэн долоо хоногийн өмнө Москва хотод шилжүүлжээ. Одоо түүнийг Москвагийн Лефортово шоронд хорьж байна.

Түүнийг цагдан хорих хугацааг дахин гурван сараар сунгаж ирэх зургаадугаар сарын 15 хүртэл үргэлжлүүлэн хорихоор болжээ. Ийнхүү ОХУ-ын орчин цагийн түүхэнд анх удаа Өмнөд Солонгосын иргэнийг тагнуулын хэргээр саатуулаад байна. Түүнчлэн ОХУ-ын арми Украины газар нутагт халдан довтолсноос хойш тагнуулын хэргээр саатуулагдсан гаднын хоёр дахь иргэн болжээ. Оросын эрх баригчид 2023 онд тагнуулын хэргээр Америкийн иргэншилтэй Эван Гершковичийг саатуулсан бөгөөд одоог хүртэл Лефортово шоронд хорьж байгаа билээ.