Европын аварга шалгаруулах тэмцээний “F” хэсгийн эхний тоглолтооо Европын аварга Португалийн шигшээ Чехийн шигшээ багийн эсрэг хийх гэж байна. Лайпцих хотын цэнгэлдэхэд энэ хоёр баг Европын аваргын түүхэнд дөрөв дэх удаагаа таарч тоглох гэж байгаа нь энэ юм. Өмнөх гурван удаагийн нэгд нь Чехийн шигшээ хожиж, үлдсэн хоёрт нь Португалийн ялалтаар өндөрлөж байжээ.
 

ПОРТУГАЛ

Португалийн шигшээ баг 2016 онд сул бүрэлдэхүүнтэй түрүүлж байлаа. Одоо тэдний хүч залуусаар сэлбэгдэж 2016 оныхоос хүчтэй бүрэлдэхүүнтэй Германд ирж байгааг мэргэжилтнүүд онцолж байна. Тэд 2022 оны Катарын ДАШТ-нд шөвгийн наймд шалгарсан. Гэвч тэд Мароккогийн шигшээ багт хожигдсон юм.

Португалийн шигшээ баг бүх тэмцээнийг оролцуулаад сүүлийн таван тоглолтын гуравт нь ялалт байгуулж, хоёрт нь хожигджээ. Тэд энэ хугацаанд 12 гоол оруулж, 8 гоол хаалгандаа алдаад байна. Олон гоол алдахгүй хамгаалж чадвал Португалийн шигшээ баг энэ тэмцээнд амжилт гаргаж мэдэх юм. Гэхдээ Роберто Мартинез том тоглогчийг зохицуулах тал дээрээ сул. Том оддыг зөв цагт нь суулгаж, зөв цагт нь талбайд гаргахаас Португалийн шигшээ багийн амжилт шалтгаална.

Хамгийн сүүлд тэд энэ сарын 12-ны өдөр Ирландын шигшээтэй нөхөрсөг тоглолт хийж Криштиану Роналдугийн хоёр гоолын ачаар 3-0 онооны харьцаагаар ялалт байгуулсан билээ. Португалийн төдийгүй дэлхийн хөлбөмбөгийн тод од Криштиану Роналдугийн замналын сүүлийн томоохон тоглолт нь энэ удаагийн тэмцээн байж болох билээ.
 

ЧЕХ

Куфал, Кречи, Соучек, Шик нарын авьяастнууд Чехийн шигшээд бий. Тэгэхээр аль ч багийн хувьд зөөлөн боорцог биш. Чехийн хувьд хаалгач л хамгийн том асуудал болоод байна. Хэрэв хаалгач найдвартай байж чадвал ялалт тэдний талд байх нь гарцаагүй. Чехийн шигшээ баг 2022 оны ДАШТ-нд оролцсон ч харамсалтай нь хэсгээсээ гарч чадаагүй билээ.

Европын том тайзанд гарахаас өмнө Чехийн шигшээ багийн форм төгс гэмээр сайн байна. Тэд бүх тэмцээний оролцуулаад сүүлийн таван тоглолтын бүгдэд нь ялалт байгуулжээ. Тэр дундаа энэ сарын 7-ны өдөр Мальтын шигшээн эсрэг нөхөрсөг тоглолтод 7-1 онооны харьцаагаар бут ниргэсэн юм. Чехийн шигшээ энэ хугацаанд 15 гоол оруулж, ердөө дөрвөн гоол л хаалгандаа алджээ. Тэгэхээр ямархан ур чадвартай гэдгийг үүнээс харж болно.
 

Дасгалжуулагч юу хэлэв?

Португалийн шигшээ багийн дасгалжуулагч Роберто Мартинез: “Чехийн хэв маяг маш сайн байгаа. Тэд эрсдэлтэй ч прессинг сайн, гоол оруулах чадвартай олон тоглогчтой. Тэд сонгон шалгаруулалтад ямархан чадвартай вэ гэдгээ хангалттай харуулсан. Бид одоогоор арван тоглолтод ялалт байгуулаад байна. Гэхдээ энэ бол Европын аваргын том тэмцээн шүү дээ. Ямар ч байсан бид өндөр ур чадвартай тоглолтыг таарах учраа бүрдээ үзүүлнэ”