Европын аварга шалгаруулах тэмцээний F хэсгийн эхний тоглолт өнөөдөр Улаанбаатарын цагаар 00:00 цагт Турк, Гүржийн шигшээ багийн тоглолтоор эхлэх гэж байна. Туркийн хувьд алтан үеэ өнгөрөөсөн гэж дүгнэж байгаа ч олон улсын түвшний нэр хүндтэй багт тоглодог хэд, хэдэн тоглогч бий. Харин Гүржийн хувьд анх удаагаа томоохон тэмцээний утаа үнэрлэх гэж байгаа нь энэ. Вилли Саньолын удирдлага дор тэднийг Европын аваргын тэмцээнд оролцоно гэж хэн ч таамаглаагүй байсан биз ээ.
 

---

ТУРК

 

Туркийн шигшээ баг орон гаран тоглолт гаргаад байсан учраас 2023 оны есдүгээр сарын 21-нд дасгалжуулагчаа сольж Итали мэргэжилтэн Винчензо Монтеллаг сонгосон. Удирдсан эхний тоглолтдоо Хорватын шигшээг 1-0 онооны харьцаагаар буулган авч, урам зоригийг сэргээсэн билээ. Туркийн шигшээ сонгон шалгаруулалтын “D” хэсэгт багтаж 17 оноотойгоор хэсгээ тэргүүлсэн. Тэд сонгон шалгаруулалтад ердөө нэг хожигдсон гэх амжилтаар Германд хүрэлцэн ирж байна. Гэвч тэдний сүүлийн үеийн форм тун хангалтгүй байгаа. Туркийн шигшээ баг хамгийн сүүлд 6-р сарын 11-ний өдөр Польшийн багтай нөхөрсөг тоглолт хийж нутагт нь 2-1 харьцаагаар хожигдсон юм.

Туркийн шигшээ бүх тэмцээнийг оролцуулаад сүүлийн таван тоглолтод хожил байгуулалгүй хоёр тэнцэж, гурав хожигдоод байна. Ялангуяа гуравдугаар сарын 27-ны өдөр Австрийн багтай нөхөрсөг тоглолт хийхэд 6-1 онооны харьцаагаар бут ниргүүлсэн билээ. Тэд энэ хугацаанд гурван гоолыг өрсөлдөгчийнхөө хаалганд оруулж, 10 гоолыг хаалгандаа алдаад байна.  
Хэдийгээр Туркийн шигшээ багийн форм муу байгаа ч Гүржийн шигшээ багтай хийсэн сүүлийн таван тоглолтын гуравт нь туркууд хожсон гэдэг сайхан үзүүлэлт байна. Гүрж болон Туркийн шигшээ баг 2012 оноос хойш анх удаа учраа таарах гэж байгаа нь энэ.

 

---

 

ГҮРЖ

 

Зөвлөлтөөс салан тусгаарласнаас хойш анх удаагаа Гүржийн шигшээ баг томоохон тэмцээний утаа үнэрлэх гэж байна. Зөвлөлтийн үед Гүржийн авьяаслаг хөлбөмбөгчид төрөн гарч байсан ч тусгаар улсын хувьд томоохон амжилт үзүүлэлгүй өдийг хүрчээ. Тэднийг Францын мэргэжилтэн Вилли Саньол дасгалжуулж буй. 2021 оноос хойш Гүржийг дасгалжуулж буй энэ эрхэм Гүржийн хөлбөмбөгийн түүхэнд тодоор дурсагдах түүхийг яг одоо бүтээгээд байна. Гүржийн шигшээд залуу авьяастан Хвица Кварацхелиа байгаагаас гадна Уатфорд клубийн хагас хамгаалагч Георги Чакветадзе, Гиорги Цитаишвили нарын ур чадвартай тоглогчид бий.

Гүржийн шигшээ бүх тэмцээнийг оролцуулаад сүүлийн таван тоглолтын гуравт нь ялалт байгуулж, нэг хожиж, нэг тэнцээд байна. Тэд энэ хугацаанд хаалгандаа зургаан гоол алдаж, найман гоол оруулаад байна. Үүнээс харвал хамгаалалтын шугам найдваргүй гэдгийг илтгэнэ. Тиймээс Туркийн шигшээ багийн эсрэг хамгаалалтын шугам нягт байж чадвал ялалт байгуулахыг үгүйсгэхгүй. Ялангуяа довтолгооны шугам сөрөг довтолгоог үр дүнтэй болгох бүрэн боломжтой.
 

---

Дасгалжуулагч юу хэлэв?

Туркийн шигшээ багийн дасгалжуулагч Винчензо Монтелла: “Олон хөгжөөн дэмжигчдийнхээ өмнө том тэмцээнд хүч үзнэ гэдэг нэр төрийн хэрэг. Гүрж бол амаргүй өрсөлдөгчид. Яг одоо түүх бүтээж байгаа энэ багийнханд урам зориг дүүрэн байна. Тоглолт амаргүй байх хэдий ч мөрөөдлийнхөө төлөө чадах бүхнийг хийх ёстой”

Гүржийн шигшээ багийн дасгалжуулагч Вилли Саньол: “Энэ бол бидний хувьд том тэмцээний анхны тоглолт. Анхны тоглолтоо бид Туркийн хүчтэй багтай хийх гэж байна. Туркийн давуу талуудыг дурдвал маш их ээ. Гэхдээ юу гээч бид яг одоо мөрөөдлөөрөө амьдарч байна. Техникийн хувьд чадварлаг олон тоглогчтой Туркийн шигшээ багийн эсрэг бүх нөөц бололцоогоо дайчлан өрсөлдөнө”