Улсын төсвийн хөрөнгөөр барьж буй бүтээн байгуулалтыг дагаад улс төр, бизнесийн нэг хачин, ашиг сонирхлын шинжтэй хоршил явдаг. Төсвөөс хулгай хийх шалгарсан хоёр арга бий. Эхнийх нь үнийн дүнтэйгээ огт нийцэхгүй чанаргүй бараа материал, бүтээгдэхүүн худалдаж авах. Үүнийг олон нийт сайн мэддэг бол тэр болгон хүмүүс мэддэггүй өөр нэг илүү хохиролтой арга байдаг.

Энэ бол анх цөөн хэдэн тэрбумын үнэлгээтэй бүтээн байгуулалтын ажлыг төсөвт суулгаж ажлыг нь эхлүүлдэг. Улмаар олон жил дамнуулан төсөвт өртгийг нь улам нэмэгдүүлэх замаар Улсын төсвийн мөнгийг цутгаж эхэлнэ. Жишээлбэл, Дархан хотод баригдаж буй Спорт цогцолборын барилга гэхэд анх 2010 онд 3 тэрбум төгрөгөөр барихаар төсөвт суулгасан байдаг бол 2024 онд 36 тэрбум төгрөгийн хөрөнгө оруулалт шаардлагатай хэмээн төсвийн төсөлд оруулж ирсэн байгаа юм. Харин Музейн барилгыг 2021 онд 5 тэрбум төгрөгт багтаахаар төлөвлөсөн атлаа 9 тэрбум 320 сая төгрөг шингээсэн ч ашиглалтад орох байтугай ханаа ч битүүлээгүй байгааг та бүхэн харах болно.