Эдийн засаг эмзэг, улсын төсөв улайсан энэ үед иргэдийн бүсийг чангалах бус төр эхлээд элдэв тансаглалаа танах шаардлага бий. Гэтэл төсвийн мөнгө зөвхөн дарга ангийн тансаглал ширээ сандлаас эхлээд ая тухтай хялбар орчинд ажиллахын төлөө байдаг үзэгдэл ирэх жил ч үргэлжлэхийг 2027 оны төсвийн төсөл харуулж байна.

УИХ-ын дарга С.Бямбацогтын 2027 онд зарцуулах төсвийн багцад Тамгын газрын тоног төхөөрөмж, цахим системийн шинэчлэл нэрээр 7 тэрбум 698 сая төгрөг тусгажээ. Үүнийг задалвал,

• Тамгын газрын хэрэгцээнд шинээр тоног төхөөрөмж худалдан авахад 4 тэрбум 598 сая төгрөг;
• УИХ-ын нээлттэй өгөгдлийн цахим систем нэвтрүүлэхэд 3 тэрбум 100 сая төгрөгийн санхүүжилтийг ирэх жилийн төсөвт суулгахаар төлөвлөсөн байна.

Уг нь УИХ-ын дарга С.Бямбацогт өөрөө хэдхэн хоногийн өмнө “Парламентын үйл ажиллагаатай холбоотой бүх мэдээлэл нээлттэй боллоо” хэмээн сүр дуулиантай зарласан. Тэр нь https://parliament.mn/ цахим хуудас шинэчилсэн ажил. УИХ-ын Тамгын газар албан ёсны цахим хуудсаа шинэчилснээр гишүүдийн ирц, санал өгсөн байдал, санаачилсан хуулийн төсөл тэргүүтэй бүх мэдээллийг ил болгосон гэж зарлаад байгаа юм. Парламентын нэр бүхий сэтгүүлчид ч тэр ажлынх нь сурталчилгаанд тоглож, магтаал сайшаалын үгийг харамгүй хайрлаж харагдсан.  
Гэтэл сүр дуулиантай зарласан тэрхүү веб сайт шинэчилсэн ажил нь араасаа 7.7 тэрбум төгрөгийн зарлага дагуулахаар байсныг хэн мэдэх билээ.