Ажил олгогчдын бараг тал хувь нь залуу ажилтнууд санаачилга гаргах тал дээр бэрхшээлтэй гэж мэдээлсэн бол 46 хувь нь тэдний мэргэжлийн хандлагатай холбоотой асуудлуудыг онцолжээ. Мөн тавны нэгээс илүү хувь (21%) нь шинэ төгсөгчид ажлын ачааллыг дийлэхгүй байх тохиолдол элбэг байдгийг, харин 20 орчим хувь нь тэднийг ажилдаа хоцорч ирэх нь түгээмэл байдгийг дурдсан байна.

Ажлаас халагдах шалтгаануудын дунд харилцааны ур чадвар сул байх (39%), санал хүсэлт, шүүмжлэлийг хүлээж авахад хүндрэлтэй байх (38%), асуудал шийдвэрлэх чадвар хангалтгүй байх (34%) зэрэг нь мөн гол байр суурийг эзэлж байв. Үүнээс гадна ажлын байранд тохиромжгүй хувцаслалт болон зарим менежерийн зүгээс хэт хурдан албан тушаал ахихыг хүссэн бодит бус хүлээлт гэж үзсэн асуудлууд ч нөлөөлөгч хүчин зүйлсэд багтсан байна.

Олон ажил олгогчийн хувьд эдгээр асуудал нь албан ёсны арга хэмжээ авах шаардлагатай түвшинд хүрсэн бөгөөд ажил олгогчдын 79 хувь нь ажлын гүйцэтгэл хангалтгүй байгаа Z үеийн ажилтнуудад гүйцэтгэлийг сайжруулах төлөвлөгөө хэрэгжүүлэх шаардлагатай болсон гэдгээ илэрхийлжээ. Ийм арга хэмжээ авсан хэдий ч эдгээр ажилтны 60 хувь нь эцэстээ ажлаасаа халагдсан байна.

Хэдийгээр сорилт бэрхшээлүүд байгаа ч Z үеийнхэн хөдөлмөрийн ертөнцийн ирээдүйг тодорхойлоход чухал үүрэг гүйцэтгэхээр байна. “Glassdoor”-ын судалгаагаар, энэ онд Z үеийнхэн бүтэн цагийн ажиллагсдын дунд "бэйби бумер" (baby boomer) үеийнхнийг гүйцэж, хамгийн том бүлэг болох төлөвтэй байв.

Дэлхийн эдийн засгийн форумын мэдээлснээр, 2027 он гэхэд Z үеийнхэн дэлхийн ажиллах хүчний дөрөвний нэгээс илүү хувийг бүрдүүлэх болно.