Ерөнхий сайд Н.Учралын хамаарал бүхий “Их засаг кинг” сургуульд төсвийн тодотголоор 3.5 тэрбум төгрөг олгохыг завдсан асуудал Боловсролын сайд Л.Энх-Амгаланг огцруулсанаар намжих төлөвтэй байна. Хэрэв энэхүү илт эрх ашгийн зөрчилтэй асуудал өндрөө авсан бол Засгийн газар ч огцрох эрсдэл байлаа. Харин Л.Энх-Амгалан Ерөнхий сайдынхаа бүх галыг өөр дээрээ авсан юм. Асуудлыг ил тод болгосон УИХ-ын эмэгтэй гишүүдийг “Түгжил” хэмээн цоллож, Ардчилсан намын дарга О.Цогтгэрэлээс эхлээд экс дарга Л.Гантөмөр нарын сургууль ч улсаас мөнгө авдаг хэмээн зарлаж орхисон. Энэ бүхэн нь 3.5 тэрбумын асуудлыг мартагнуулж, эх захгүй хэрүүлийг эхлүүлсэн гэхэд болно.

Тийм болохоор намын даргынхаа уурыг хүргэхгүйгээр гэхдээ бас өөрсдийгөө байгаа гэдгийг мэдрүүлснээр асуудлыг дуусгахыг хүсжээ. Өнөөдөр МАН-ын 30-ийн бүлгийг тэргүүлж буй УИХ-ын гишүүн Д.Амарбаясгалан “Л.Энх-Амгалан сайдыг улс төрийн соёл гаргаад огцрох ёстой гэдэг шаардлага тавьсан ч өнөөдрийг хүртэл огцрохгүй байгаа учраас бид цаашид энэ асуудлыг Өргөдлийн байнгын хороогоор хэлэлцэнэ” гэв. Хамгийн гол нь УИХ-ын гишүүн бүрийн эрх ашиг шингэчихсэн Улсын төсвийн хэлэлцүүлгээ хийхийг бүгд хүсэж байгаа.

Бүр ч шог явдлууд давхар давхар болж буй бололтой. МАН-аас хавар хийсэн дотоод судалгаагаар Л.Энх-Амгалан их өндөр рейтингтэй гарч таарсан гэдэг. Тиймээс ч хойтон жил болох Ерөнхийлөгчийн сонгуульд нэр дэвших хүсэлтэй намын найзууд нь бүдрэх болгонд нь өшиглөхөөр пиарчиддаа үүрэг өгсөн гэдэг. Түүнчлэн Ерөнхий сайдын өрөөнд Хөвсгөлийг төлөөлдөг хоёр УИХ-ын гишүүн орж Л.Энх-Амгалан огцруулбал дэмжинэ гэж гэсэн яриа ч гарсан. Тал талаасаа ямар ч байсан нэгийгээ намнаж авахаар шийджээ.

Энэ бүхний эцэст “хонь бүрэн чоно цатгалан” боловч Засгийн газрынхаа танхимыг авч үлдэх гэж Ерөнхий сайдын өмнүүр гүйж нүүрээ түлсэн Л.Энх-Амгалангаар туг тахих гэж буй нь зөвхөн Л.Энх-Амгаланд л эмгэнэлтэй юм даа.