Сэтгэгдэл 0
Олон нийтийн сүлжээнд сонгуулиар Монголын улс төрийн намууд болон хувь улстөрчдөд хамгийн өндөр дүнтэй санхүүжилтийг хандив нэрээр халхавчлан өгч, хариуд нь эдийн засгийн ашиг сонирхлоо төрийн дэмжлэгтэй гүйцэлдүүлсэн ээлжит тендерийн талаар шуугьж эхэлсэн. Энэ шүүмжлэл Говийн бүсийг сэргээгдэх эрчим хүчээр хангах тус зөвшөөрлийг авах сонгон шалгаруулалтад 10 компани оролцох санал гаргажээ. Гэвч Эрчим хүчний яамнаас 2 нь өрсөлдөөнд оруулж, “М Си Эс интернэйшнл”, түүний охин компани “Нет зеро тек”, “Өвөр Монголын Эрчим хүчний олон улсын хамтын ажиллагаа” ХХК түншлэл шалгарсантай холбоотой.
Учир нь Монголын хамгийн нөлөө бүхий компани “М Си Эс групп” 2024 оны парламентын сонгуулиар эрх баригч МАН-д 1.1 тэрбум, Ерөнхий сайд Н.Учралд 270 сая, энэ удаагийн сонгон шалгаруулалтыг зохион байгуулсан гэх Шадар сайд Т.Доржханд, Эрчим хүчний сайд Б.Найдалаа нарын толгойлж буй ХҮН нам 1 тэрбум төгрөгийн хандив авсан байдаг. Үүнээс гадна Б.Найдалаа улс төрд орохоосоо өмнө нь “М Си Эс групп” болон түүний охин компанид удирдах албан тушаал хашиж байсан түүхтэй. Иймээс Засгийн газрын дэмжлэгтэй Эрчим хүчний яамнаас явуулсан “Говийн бүсэд сэргээгдэх эрчим хүчний үүсгүүр барих” сонгон шалгаруулалт анхнаасаа “М Си Эс групп” ялах нь тодорхой байсан гэдгийг салбарынхан мэргэжилтнүүд бүгд хэлж байгаа. Мөн нэр бүхий төрийн өндөр албан тушаалтнууд “М Си Эс интернэйшнл” том чадлын нар, салхины станцын дэмжүүлэх лоббиг олон жилийн турш хийсээр ирсэн гэдгийг гэрчилж буй.
Төслийн хувьд 270МВт сэргээгдэх эрчим хүчний систем нийт хөрөнгө оруулалт 400 сая орчим ам.долларын хөрөнгө оруулалттай. “М Си Эс интернэйшнл” салбартаа туршлагатай компани учраас Оюутолгойн уурхайн эрчим хүчийг 99.5 хувийн найдвартай хангана гэдгийг тус компанийн гүйцэтгэх захирал Ч.Даваахүү танилцуулжээ.
Авлигын хэргээр ял авсан Б.Насантогтох ба “М Си Эс интернэйшнл”-ийн ээлжит авлигын түүх
Тэгвэл “М Си Эс интернэйшнл”-ийн эрчим хүчний салбар дахь түүх авлигын хэргүүдтэй удаа дараа холбогдож байжээ. Жишээ татахад, Эрчим хүчний яамны удирдлагаар ажиллаж байхдаа үйлдсэн хэрэгтээ 5 жилийн хорих ялаар шийтгүүлсэн Б.Насантогтох албан тушаалаа урвуулан ашиглаж, “М Си Эс интернэйшнл” ХХК-д үйлчилсэн гэдгийг АТГ, прокурор тэргүүтэй хуулийн байгууллагууд танилцуулсан. .
Тус компани өөрийн албан ёсны цахим хуудастаа, Баянхонгор аймгийн Шинэжинст суманд үйл ажиллагаа явуулж буй Баянхөндий алтны ордыг ашиглагч “Эрдэнэ монгол” ХХК-тай “Цахилгаан эрчим хүч нийлүүлэх” гэрээний хүрээнд шугам, дэд станц зэргийг 2023-2025 онд өөрийн хөрөнгөөр барьж байгуулсан гэдгийг онцолсон байна. Өөрөөр хэлбэл, АТГ-ын мэдээнд дурдсан Баянхонгор аймгийн Шинэжинст суман дахь баяжуулах үйлдвэрийн цахилгаан эрчим хүчний хангамжийн дэд бүтэц, найдвартай ажиллагааг “М Си Эс интернэйшнл” ХХК өнөөг хүртэл хариуцдаг гэсэн үг.
Б.Насантогтох 2023 оны арваннэгдүгээр сарын 16-нд энэхүү ордыг түшиглэн байгуулсан баяжуулах үйлдвэрийн цахилгаан эрчим хүчээр хангах зураг төсөл, эх үүсвэр авах байгууллагын зөвшөөрөл байхгүй зэрэг тодорхой шалгуур хангаагүй байхад зөвшөөрөл гаргаж өгсөн. Ийнхүү Техникийн нөхцөл олгох ажлын хэсгийн даргын албан тушаалаа ашигласан зүтгэлийнхээ хариуд эхнэрийнхээ “Эн Ар Жи хөгжил” компаниар 5.5 тэрбум төгрөгийн үнэ бүхий Нарийнсухайт боомт-Баянхөндий чиглэлийн 220 км, 110 кВт-ын цахилгаан дамжуулах агаарын шугамын аянгын болон ган голтой хөнгөн цагаан дамжуулагч утсыг “М Си Эс интернэйшнл” ХХК-д нийлүүлжээ. Нарийнсухайт-Баянхөндий цахилгааны шугам нь Өвөрмонголын Алшаа аймгаас эрчим хүч импортоор авч, нийлүүлдэг.
Хамгийн гол нь, Б.Насантогтох хэргийн мөрдлөгийн үеэр авлига, албан тушаалын гэмт хэрэг үйлдсэнээ бүрэн дүүрэн хүлээн зөвшөөрч, прокурортой ял тохиролцсон. Шүүх хурал дээр үүнийгээ баталгаажуулсан юм.
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд SHUGELULEEGCH.mn хариуцлага хүлээхгүй.