“Далай ээжийн үзэсгэлэнт эрэгт нүхэн жорлон ч ухуулахгүй” хэмээн ам гарч явсан БОАЖ-ын сайд Б.Бат-Эрдэнэ Хөвсгөл нуурын эрэг дагуу нэр бүхий 10 иргэн, 1 компани, 1 төрийн бус байгууллагад олон арван га газрыг эрх мэдлийнхээ хүрээнд олгосон баримттай танилц. Газар олгосон жагсаалтад багтсан “Дээрхийн далай” нэртэй компанид Малчин толгой хэмээх газарт дангаар нь 18 га газар эзэмшүүлсэн нь нутгийн иргэдийн эгдүүцлийг төрүүлэх болжээ.

Үүгээр зогсохгүй Далайн зүүн эргийн үзэсгэлэнт Доншиг хэмээх газарт 1.99 га газрыг “Монголын прокуроруудын холбоо” гэх гишүүддээ үйлчилдэг ашгийн төлөө төрийн бус байгууллагад эзэмшүүлсэн нь БОАЖ-ын сайд Б.Бат-Эрдэнийн өөрийн гарын үсэгтэй албан бичгээр нотлогдов. Мэдээллийг хөөгөөд үзэхэд, “Монголын прокуроруудын холбоо”-ны Удирдах зөвлөлийн даргаар Улсын ерөнхий прокурорын орлогч С.Алиманцэцэг ажилладаг. Прокурор С.Алиманцэцэг Ерөнхийлөгч асан Х.Баттулгын үед томилогдсон бөгөөд Үндэсний аюулгүй байдлын зөвлөлийн Нарийн бичгийн дарга асан А.Гансүхтэй нэг ангийнх аж.

Тэгвэл тус холбооны эцсийн өмчлөгчөөр бүртгүүлсэн Ц.Батболд саяхнаас Улсын ерөнхий прокурорын дэргэдэх Сургалт судалгааны төвийн даргаар ажиллах болжээ. Мөн улсын ерөнхий прокурорын орлогчоор ажиллаж байсан Ц.Бямбацогт тус холбооны хувьцаа эзэмшигч байна. Энэ мэт нөлөөтэй эрхмүүд Хөвсгөл нуурын байгалийн цогцолбор газарт жирийн иргэдэд олдоод байдаггүй том газар эзэмших болжээ.

Хамгийн сонирхолтой нь Засгийн газраас Шилэн ажиллагааны хүрээнд тусгай зөвшөөрөл олгосон мэдээллийг олон нийтэд зарлаад байгаа. Тэгвэл улсын тусгай хамгаалалттай газрын мэдээллийг 100 хувь ил тод болгосон гэх www.shilen.gov.mn уг мэдээлэл байсангүй. Гэтэл тус сайтад БОАЖЯ-ны мэдээллийг 100 хувь ил тод болсон гэж онцолсон байх юм. Иймд прокуроруудад байгалийн цогцолбор газарт 1.99 га газар олгосон энэ мэдээллийг БОАЖ-ын сайд Б.Бат-Эрдэнэ өөрөө зориуд нуун дарагдуулав уу гэдэг асуулт үлдэж байна.