ОХУ  ихэнх гадаад зах зээлд нийлүүлэлтийг хориглосон ч наймдугаар сард Төв Азийн орнуудад дизель түлшний экспортоо огцом нэмэгдүүлсэн байна. Орос  шатахууны үнийн өсөлтийг хязгаарлах, Украины нисгэгчгүй онгоцоор газрын тос боловсруулах үйлдвэрүүдэд халдсанаас үүдэлтэй хомсдолыг арилгахын тулд бензин, дизель түлшний экспортод удаа дараа хязгаарлалт тавьсан.

Наймдугаар сарын сүүлээр Москва Засгийн газар хоорондын хэлэлцээрийн дагуу хуучин Зөвлөлтийн бүгд найрамдах улсууд болон Монгол зэрэг орнуудад нийлүүлэлт хийхийг зөвшөөрч, дизель түлшний экспортод тавьсан хоригийг есдүгээр сарын сүүл хүртэл сунгасан.

"Financial Times" сонины мэдээлснээр, дизель түлшний хомсдол болон түлшний үнийн огцом өсөлтөөс шалтгаалан АНУ-ын Ерөнхийлөгч Дональд Трамп Украины Ерөнхийлөгч Зеленскийд хандан Оросын газрын тос боловсруулах үйлдвэрүүд рүү хийх халдлагаа зогсоохыг уриалсан.

Худалдаачдын мэдээлснээр, ОХУ  наймдугаар сард Казахстан, Киргизстан, Монгол, Тажикистан руу нийт 370 мянган тонноос илүү дизель түлш экспортолсон нь долоодугаар сарынхаас хоёр дахин их үзүүлэлт болсон байна.

ОХУ өдөрт дунджаар 170 мянган тонн дизель түлш үйлдвэрлэдэг болсон хэдий ч энэ хэмжээ нь тус улсаас дизель түлшний экспортыг бүрэн хэмжээгээр сэргээхэд хангалтгүй байгааг худалдаачид хэлж байна.

Салбарын эх сурвалжийн мэдээлснээр, Оросын дотоодын зах зээлд нийлүүлсэн дизель түлшний хэмжээ долоодугаар сард 5.0 сая тонн байсан бол наймдугаар сард 4.7 сая тонн болж буурчээ.

Худалдаачдын мэдээлснээр, Монгол Улс руу нийлүүлсэн дизель түлшний хэмжээ 7-р сард 124,000 тонн байсан бол 8-р сард 215,000 орчим тонн болж өсжээ. Киргизстан руу хийсэн экспорт ердөө 4,400 тонноос 72,000 гаруй тонн болж нэмэгдсэн бол Тажикистан руу нийлүүлсэн хэмжээ 16,000 тонноос 56,000 гаруй тонн болж өссөн байна. Казахстан улс долоодугаар сард Оросын дизель түлш огт импортлоогүй байсан бол наймдугаар сард 28,000 орчим тонныг импортолжээ.

Оны эхний найман сарын байдлаар Оросоос Төв Ази болон Афганистан руу нийлүүлсэн дизель түлшний нийт хэмжээ 2.5 сая тонн болсон нь өмнөх оны мөн үеийн 2.6 сая тоннтой харьцуулахад бага зэрэг буурсан үзүүлэлт юм. Худалдаачдын мэдээлснээр, Монгол Улс Оросын дизель түлшний хамгийн том худалдан авагч хэвээр үлдэж, энэ онд Төв Ази болон Афганистан руу хийсэн нийт нийлүүлэлтийн тал орчим хувийг эзэлжээ.