Шуудхан хэлэхэд, Н.Учралд Засгийн газрын тэргүүн, намын даргын зангараг аль аль нь алга. Н.Учрал зургаан сар орчмын өмнө Ерөнхий сайдаар томилогдохдоо л төрийн ордон төдийгүй нам дотроо хүлээн зөвшөөрөгдсөн дарга байгаагүй. Өнөөдөр ч легитим чанартай лидер болж чадаагүй хэвээр байна.

Төрийн ордонд түүний анх удаа Ерөнхий сайдын хувиар өргөн мэдүүлсэн бүтэн жилийн төсөв битгий хэл төсвийн тодотголыг дэмжиж буй гишүүн цөөнх болсныг УИХ-ын чуулганы нэгдсэн хуралдаан арваад хоног ирцээ бүрдүүлж чадахгүй гацаанд орсон гэдгээс харж болно. Түүний бүрэн эрхийнхээ хүрээнд дэвшүүлсэн сайдыг хүртэл УИХ хүлээн зөвшөөрөхгүй байна. Уг нь тэр УИХ-д 68 гишүүнтэй эрх баригч намын дарга сэтэртэй юм сан. Үүнээс харахад, Үндсэн хуулийн дагуу 1992 оноос хойш байгаагүй Ерөнхий сайдын эрх мэдэл, Ерөнхийлөгчийн дэмжлэг, намын байранд эзэн суусан ах нарынх нь дэмжлэг түүнд тус болсонгүй. Түүнийг хүрээлэгчид тус болох байтугай гай болж буйг Засгийн газрын танхим дотроо ч учраа олж чадахгүй байгаа нь илтгэнэ. Ерөнхий сайд Н.Учралын хувийн сургуулиудтай холбоотой санхүүжилтийн хэргийг Засгийн газрын гишүүд дундаас гаргасан гэдэг хэн бүхэнд ойлгомжтой болсон зүйл. УИХ-ын чуулганы нэгдсэн хуралдаан хуралдахад хоёр гишүүний ирц дутаж байхад түүний Засгийн газарт сайдаар ажиллаж буй Шадар сайд Н.Номтойбаяр, Цахим хөгжлийн сайд Ч.Номин нар ил цагаан бойкот хийх жишээний. Товчхондоо, Н.Учрал хичнээн эрээд УИХ, Засгийн газрын танхимаас дэмжлэг олж чадахгүй байна.

Aрга ядсан Ерөнхий сайд гудамжинд гаран, зах дэлгүүр хэсэж ард түмнээс “Би цалин, тэтгэвэр нэмэх гэж байна. Тойргийн гишүүдээ чуулгандаа суу гэж хэл” хэмээн хов зөөн, дэмжлэг гуйж яваа нь даанч хөөрхийлөлтэй. “МАН-ын удирдах ажилтны зөвлөгөөн” нэрээр хөдөө орон нутгаар хийж буй уулзалт цуглаан нь хүн бус хоосон суудлаар дүүрэх болсныг гайхах юмгүй.

Иймд Ерөнхий сайд, МАН-ын дарга Н.Учралд өөрт нь итгэддэггүй Засгийн газар, УИХ-д олонхыг бүрдүүлж буй намын бүлгээ айлгах ганц гарц нь парламентын ээлжит бус сонгууль. Залуу хүний энэхүү зоримог санаачилгыг нь парламентын 2024 оны сонгуулиар төрийн ордны гадна үлдсэн маш олон улстөрч дэмжиж байгаа нь илт. Гэхдээ тэдний мөрөөдөл биелэхгүй. Хэрэв УИХ тарахтаа тулвал, Засгийн газрг шинээр эмхлэх нь МАН, АН хэн хэндээ ашигтай. Ардчилсан парламентын тогтолцоонд Засгийн газар огцрох нь байдаг л үзэгдэл гэдэг МАН-ын нэр бүхий лидерийн үг үүнийг гэрчилнэ. УИХ-ын чуулганыг хуралдуулахгүй байгаа түүний эсрэг олонхын ирц энэ үйл явцыг баталгаажуулж байна.