Аудитын судалгаагаар төрийн өмчит компаниудын 349 захирал, дарга 2025 онд нийт  34.5 тэрбум төгрөгийн цалин, урамшуулал авчээ. Тэдгээрийг Хөгжлийн банк, төрийн банк тэргүүтэй санхүү, “Чингис хаан баялгийн сан” хуучнаар “Эрдэнэс Монгол” нэгдэл, “Эрдэнэс Тавантолгой” ХК зэрэг уул уурхайн компаниудын захирлууд цалингаараа толгой цохиж байна.

Мөн банк санхүү, уул уурхайн компаниуд хамгийн олон захирал, даргатай гэдгээрээ төрийн өмчит хуулийн этгээдүүдийг тэргүүлдэг. Жишээ нь, “Эрдэнэс Тавантолгой” ХК тус бүр 20 орчим сая төгрөгийн үндсэн цалинтай 11 захирал, 6 газрын даргатай. Тэд цалингаасаа гадна хагас жил, улирлаар тооцон олон арван сая төгрөгийн урамшуулал авдаг. Тэгвэл Төрийн банк дунджаар 20 сая төгрөгийн цалинтай 8 захирал, 15 газрын даргатай үйл ажиллагаа явуулж байна. Төрийн өмчит компаниудын захирал, дарга нар бүтцээсээ хамаарч дороо 3-4 хэлтэстэй бөгөөд Төрийн банк гэхэд хэлтсийн 30 дарга цалинжуулдаг.