Төрийн ордонд “Дараагийн Засгийн газарт Б.Энхбаяр Хууль зүйн сайд болно” гэх бор шувуу нисэж эхэлжээ. Яг үүнтэй зэрэгцээд Ерөнхий сайд асан, УИХ-ын гишүүн Л.Оюун-Эрдэнэ “Ерөнхий сайд болгоныг огцруулаад өөрсдөө ажилдаа үлддэг сайд нар одоо болих хэрэгтэй. Миний удирдаж байсан Засгийн газрын дараа Г.Занданшатарын танхимд, одоо Н.Учралын засагт сууцгааж л байна. Энэ хүмүүсийг ажилтай байлгах гэж Ерөнхий сайдууд өмнө нь гарч мишок шиг нүдүүлж байх юм уу. Ер нь Засгийн газар тогтворгүй болж буй энэ эхлэл бол “2А” гэж өөрсдийгөө нэрлэсэн Б.Энхбаяр тэргүүтэй хэдэн далдаакуудаас л болж байгаа шүү” гэв. 2А гэдэг УИХ-д хоёр дахь удаагаа сонгогдсон гишүүдийн нэгдлийг хэлж байгаа хэрэг.

Н.Учралын Засгийн газрын хувь заяа хэрхэх нь дээсэн дөрөөн дээр байгаа энэ өдрүүдэд экс Ерөнхий сайдын хэлсэн үг Б.Энхбаярыг чиглэж байгаа нь зүгээр тохиолдлын хэрэг биш ээ. Учир нь тэрбээр үнэхээр л Л.Оюун-Эрдэнэ, Г.Занданшатарын Засгийн газарт Хууль зүйн сайдаар ажиллаж байсан бол өдгөө Н.Учралын танхимд Монгол Улсын сайд, Хэрэг эрхлэх газрын даргаар ажиллаж байна.

Замналын хувьд Сү.Батболдын туслахаас эхэлсэн, “Голомт”-ын Д.Баясгалангийн зөвлөх явсан гээд арвин юм их. Дарга, холбоотноо үргэлж сэлгэх замаар өгссөн ч гэдэг. Хууль зүй, дотоод хэргийн яамны дэд сайдаар ажиллаж байхдаа сайд Ц.Нямдоржтойгоо ам сөрж анх олон нийтэд танил болж байлаа. Түүний дэд сайдаар ажиллаж байсан 2016-2018 онд үнэмлэхүй эрх баригч МАН-аас УИХ-д сонгогдсон 65 гишүүн 33, 32-ын бүлэг хэмээн хуваагдаад байсан үе. Тухайн үеийн улс төрийн уур амьсгалаар бодох юм бол сайд, дэд хоёр муудалцах бол нэг их гайхаад байхаар зүйл биш.

Эндээс нэг сонирхолтой дүгнэлт гарна. Хэрэв УИХ дахь МАН-ын бүлэг хагарч хуваагдаагүй бол Б.Энхбаяр гэдэг хувь хүнд хүрд эргүүлэх боломж гарах байсан нь тун ч эргэлзээтэй. Учир нь, МАН-ын хоёр хуваагдал эцэс болж У.Хүрэлсүх Ерөнхий сайд болсоноос хойш буюу 2017 оны төгсгөлөөс эхлээд Б.Энхбаяр гэдэг хувь улстөрч бүдгэрч эхэлсэн юм. Сул гишүүн явсан тэрбээр 2023 оноос Л.Оюун-Эрдэнийн Засгийн газарт Хууль зүйн сайдаар эргэн ирсэн. МАН дотор шинэ хагарал сууриа тавьж байсан үе шүү дээ. Дараа нь өнгөрсөн жил Г.Занданшатар хуулийн сайд Л.Мөнхбаатараа хөөж явуулаад “Хуулийн төмөр илд” хэмээн Б.Энхбаярыг тавьж байлаа. Нэг ёсондоо улс төрийн хуваагдлын үед намын нөхдөө ч, өөр бусдыг ч яаж л бол яаж гүтгэж харлуулдаг, айлгаж ичээдэг зан нь хэрэг болсон гэсэн үг. Намынх нь нөхдийн яриа юм шүү. Энэ талаар Л.Оюун-Эрдэнэ “Яг л могой шиг” гэж байв. Тэгвэл улс төр халуурсан эдгээр өдрүүдэд тэрбээр дөрөв дэх танхимынхаа хаалгыг Хууль зүйн сайд болон татна гэсэн яриа эрчээ авчээ. Л.Оюун-Эрдэнийн хэлснээр түүний дараагийн золиос нь хэн байх бол.