УИХ-ын гишүүн Л.Гантөмөр өнөөдөр Төрийн ордонд мэдээлэл хийж, сэтгүүлчдийн асуултад хариуллаа

-УИХ дахь АН-ын бүлгийн хуралдаанаар Ерөнхий сайдад итгэл үзүүлэх асуудлыг ярьж байна гэдэг мэдээ гарсан. Энэ талаар?
-Ерөнхий сайд өөрт нь итгэл үзүүлэх асуудлыг өөрөө санаачилна. Манайхаас огцруулах асуудал орно гэж ойлгож байгаа. Огцруулах түмэн шалтгаан байгаа биз дээ. Нэгдүгээрт, үнийн өсөлтийн эсрэг огт хөдөлсөнгүй. Ямар нэгэн бодлого гаргах ёстой. Үнийн дарамт үнэхээр бүх бараан дээр гараад ирлээ. Ялангуяа сүүлийн долоо хоногийн хугацаанд үл хөдлөх хөрөнгийн үнэ, түрээсийн үнэ огцом хөдөлж байна шүү дээ. Энэ үнийн өсөлтийн эсрэг тодорхой бодлого гаргах байтал огт хөдөлсөнгүй. Бас бензин тосны хангамжийн асуудлыг өнгөрсөн жилийн намар ярьсан. Харамсалтай нь, жилийн хугацаанд юу ч хийгээгүй. Зунжингаа монголчуудыг очерлууллаа. Цаашлаад ямар нэгэн байдлаар үнийг тогтворжуулах бодлого харагдахгүй байна. Харин ч эсрэгээрээ үнийг өдөөх, гал дээр тос нэмэх ажлыг хийж байгаа.

-Ерөнхий сайдын хамаарал бүхий сургуульд 3.5 тэрбум төгрөг хуваарилах гэж байсан асуудал үүслээ. Энэ дээр хариуцлага үүрэх ёстой юу?
-2023 онд Нийтийн ашиг сонирхлын хуульд нэмэлт, өөрчлөлт орсон. Энэ өөрчлөлтөөр УИХ-ын гишүүдийн хамаарал бүхий этгээдүүд төрөөс зээл авах, тендерт оролцохыг хориглосон шүү дээ. Яг энэ дагуугаа л явмаар байна. Жилдээ нэг удаа нийтийн ашиг сонирхлын хуулийн хэрэгжилтийг УИХ дээр сонсож баймаар байна. Энэ хуулийн биелэлт хэрхэн хангагдаж байгааг заавал сонсох хэрэгтэй. Ингэж чадвал бүх газар дохио авна. Бид хууль баталчихдаг. Гэхдээ хяналт хийгдсэнгүй. Хяналтын мэдээлэл явсангүй. Тийм учраас бид сонирхлын зөрчлөөс ангид байхыг хатуу баримтлахгүй бол болохгүй ээ. Ер нь төсвийн мөнгийг хувийн сургууль ч байна уу, компани ч байна уу хувийн байгууллагад шууд олгодог гэдэг зүйл байж болохгүй. Би бол ямар ч тохиолдолд буруу гэж хэлнэ.