Ерөнхий сайд Н.Учралын гэр бүлийн бизнес, “Их засаг кинг” сургуульд 2026 оны төсвийн тодотголоор 3.5 тэрбум төгрөг олгохыг завдсан асуудалд УИХ дахь АН-ын гишүүд тун ч нухацтай хандаж байна. Сөрөг хүчний бүлэг чуулганы хуралдааныг хоёр өдөр бойкот хийлээ. УИХ-ын чуулган пүрэв, баасан гарагт хуралдах товтой ч хуралдаж чадсангүй. Төсвийн тодотгол хэлэлцэж буй тул   Эдийн засгийн байнгын хороо, Төсвийн байнгын хороо хуралдаж байж чуулганы хуралдаан болох ёстой. Гэтэл Эдийн засгийн байнгын хорооны хурал хоёр өдрийн турш ирцээ бүрдүүлж чадалгүй тарав.

Эх сурвалжийн мэдээлснээр төсвийн тодотгол хэлэлцэж буй энэ үед Ерөнхий сайд Н.Учрал ашиг сонирхлын зөрчилтэй асуудал оруулж ирсэн нь АН төдийгүй МАН-ын бүлгийн гишүүдийн ч эсэргүүцэлтэй тулгарсан. Улмаар төсвийн тодотголыг хэлэлцэхгүй байх бойкотыг АН-ын залуу гишүүд манлайлж буй аж.

АН-ын дарга О.Цогтгэрэл нар маргааш буюу бямба гарагт БНХАУ дахь томилолтоо дуусган ирнэ. Намын даргаа ирсэн даруйд АН-ынхан Ерөнхий сайд Н.Учралын холбогдсон асуудлыг нухацтай хэлэлцэхээр төлөвлөжээ. Тэгвэл АН-ын дотоод эх сурвалж “Намын дарга өөрийг нь иртэл Н.Учралын асуудал, төсвийн тодотгол тойрсон улс төр хийхийг азна” гэдэг үүрэг өгсөн гэдгийг хэллээ. Учир нь АН-ын бүлэг дотор намын удирдлагаа энэ оны төсвийн тодотгол, ялангуяа татвар төлөгчдийн мөнгөнөөс Ерөнхий сайд өөрийн хамаарал бүхий сургуульдаа илтэд ашиг сонирхлын зөрчилтэй дэмжлэг үзүүлэх гэж байсан талаар улс төрийн шийдвэр гаргах ёстой гэдэг байр илэрхийлэх гишүүд олширчээ.

Өөрөөр хэлбэл, АН-ын хэсэг гишүүдийн шахалтаар Ерөнхий сайд Н.Учралын ашиг сонирхлын зөрчилтэй байж болзошгүй асуудал ирэх өдрүүдэд нэлээд өндрөө авч мэдэхээр байна.