УИХ-ын Өргөдлийн байнгын хорооны өчигдрийн хуралдаанаар 2026 оны төсвийн тодотголыг хэлэлцэх үеэр хувийн хэвшлийн өндөр төлбөртэй 3 сургуульд улсын 7.1 тэрбум төгрөгөөр тоног төхөөрөмж авч өгөх асуудал сөхөгдөж олон нийтийн шүүмжлэл дагуулсан. УИХ-ын гишүүн О.Номинчимэг, Х.Баасанжаргал нарын зүгээс энэ асуудалд ямар нэг ашиг сонирхол байгаа эсэхийг холбогдох албаныхнаас тодруулсан ч тойм хариу өгөх албан тушаалтан олдоогүй.
Тэгвэл Боловсролын яам “Гэр ойрхон сургууль-хамгийн сайн сургууль” хөтөлбөрийн хүрээнд “Их Засаг кинг”, “Шинэ санаа”, “Империал” сургуульд ачаалал тэнцвэржүүлэх, төрөлжүүлэх чиглэлээр 7.1 биш 9.2 тэрбумын тоног төхөөрөмж олгохоор төлөвлөсөн нь болов. “Их Засаг кинг” гэхэд л Ерөнхий сайд Н.Учралын хамаарал бүхий сургууль гэдгийг олон нийт мэднэ. “Шинэ санаа” сургуулийн захирлаар З.Даваажаргал, “Империал”-ийн эзэн нь “Loriblu Mongolia”-ийн захирал Н.Лхамсүрэн юм. Хувийн хэвшлийн дээрх сургуулиудад хуваарилсан зардлыг харвал, “Шинэ санаа”, “Империал” сургуульд 2 тэрбумын дэмжлэг, төрөлжүүлэхээр “Их Засаг кинг”, “Шинэ санаа” зэрэг 3 сургуульд 7.1 тэрбумын дэмжлэг олгохоор болоод байгаа юм. “Шинэ санаа”, “Империал” сургуулиуд нь Хан-Уул дүүрэгт байрладаг бол “Их Засаг кинг” Сонгинохайрхан дүүрэгт байрладаг аж.
Засгийн газраас танилцуулсан “Гэрт ойрхон сургууль-хамгийн сайн сургууль” хөтөлбөрт зөвхөн ерөнхий боловсролын сургуулиудыг хамруулна гэж заасан.