Шинэ тайланд дурдсанаар, олон тооны ажил олгогчид залуучуудыг ажилд шаардлагатай практик ур чадвар эзэмшээгүйгээр сургуулиа төгсөж байна гэж үзэж байна. 1100 менежерийн дунд явуулсан судалгаагаар тэдний тал хувь нь цаг баримтлах, эсвэл харилцааны зохих соёлд суралцаагүй залуу ажилтнуудтай таарч байсан хэмээн ярьсан байна. "Chartered Management Institute" (CMI)-ийн мэдээлснээр, ажил олгогчдын зүгээс голчлон шаарддаг чанаруудад тодорхой бөгөөд мэргэжлийн түвшинд ярих, түүнчлэн бусдын санал шүүмжлэлийг зөв хүлээж авч, түүний дагуу арга хэмжээ авах зэрэг чадварууд багтаж байгаа аж. CMI-ийн Бодлогын асуудал хариуцсан захирал Петра Уилтон  "Залуучууд боловсрол нь тэднийг ажил хөдөлмөрт бэлтгэнэ гэдэгт итгэдэг тул ажил олгогчид огт өөр ур чадвар шаарддаг болохыг ажилд орсон эхний өдрөө л мэдэж, тэдний хувьд гэнэтийн, таагүй байдал бий болдог. Залуучуудыг ажилд авдаг 10 менежер тутмын 4 нь тэдний боловсролын явцад эзэмшсэн мэдлэг, ур чадвар болон ажлын байрны бодит шаардлага хоёрын хооронд зөрүүтэй байдал үүсэж байсантай нүүр тулгарч байсан" гэжээ. Хөдөлмөрийн аюулгүй байдал, эрүүл ахуйн хүрээлэнгийн (IOSH) дэд ерөнхийлөгч Маколей Куинн “Ур чадварын хомсдол, ажилд авахад тулгарч буй бэрхшээлүүдийн дунд ажил олгогчид  залуу авьяастнуудыг цэцэглэн хөгжих боломжоо алдахаас нь өмнө хөөж гаргаж байж магадгүй бөгөөд 31 хувь нь ажлаасаа гарах талаар бодож байна. Өндөр гүйцэтгэлтэй ажил олгогчид ажиллах хүчнийхээ чадавхийг дээд зэргээр нэмэгдүүлэхийн ач холбогдлыг бүрэн хүлээн зөвшөөрдөг. Энэ бол шилдэг байдал, зах зээлийн өрсөлдөх чадварыг бий болгох зам юм. Дараагийн үеийнхэнд хөрөнгө оруулснаар ажил олгогчид өөрсдийн ирээдүйд хөрөнгө оруулж байна гэсэн үг” хэмээсэн байна.