Өнгөрсөн хоёрдугаар сарын 8-ны өдөр Хүнс, хөдөө аж ахуй, хөнгөн үйлдвэрийн сайд Х.Болорчулуун малын гаралтай түүхий эдийн гарал үүслийг тодорхойлох зорилгоор нийт үхэр сүргийг ээмэгжүүлэх болсныг зарласан. Тэрбээр “Манай улс шиг үхэр сүргээ ээмэгжүүлээгүй улс маш цөөхөн байдаг юм байна. Энэ хавар 5.5 сая үхрээ бүгдийг нь ээмэгжүүлж, цахим бүртгэлд оруулна. Ингэснээр үхрийн мах аль аймгийн аль сумаас ирсэн бэ гэдэг гарал үүсэл нь тодорхой болно. Дагаад малын хулгай буурна. 5.5 сая үхрийг ээмэгжүүлэхэд 13 тэрбум орчим төгрөг шаардлагатай. Тус хөрөнгийг төсвөөс бус Хөдөө аж ахуйн яамнаас хэрэгжүүлдэг зарим төслөөс, Хөдөө аж ахуйн биржийн ашигтай ажилласан ажиллагаанаас шийдвэрлүүлнэ” гэсэн байдаг. Улмаар энэ ажлыг тавдугаар сар гэхэд бүрэн дуусгана гэж мэдэгдсэн юм.

Гэвч улс оронд эдийн засгийн хүндрэл үүссэн, үнийн өсөлт их байгаа үед үхэр ээмэгжүүлэх нь тулгамдсан асуудал мөн үү гэсэн шүүмжлэл өрнөсөн. Түүгээр үл барам малын ээмэгний үнэ ханш ямар байдаг тухай багагүй хэлэлцүүлэг өрнөсөн юм. Үнэгүй.мн зарын сайтад 2022 оны зургаадугаар сард нэгэн компани “GPS төхөөрөмжид холбогддог малын ээмэг нэг ширхэгийг нь 700 төгрөгөөр бодож худалдана” гэсэн зар ч оруулсан байдаг. Түүнчлэн гадаад худалдааны сайтуудад үүнээс ч илүү хямд үнээр борлуулах тухай мэдээлэл ч олон илэрч байгаа. Хэрэв Хятад улсаас саяар тоологдох тоогоор оруулж ирвэл 200, 300 төгрөгт ч багтаж болох тухай ярьж байна. Манай улсад ороод ирсэн, худалдан борлуулж буй малын ээмэгны үнэ зарын сайтад 700 төгрөг гэж байгаа атал ХХААХҮЯ-наас зарласан тендерт нэг бүрийн үнийг 2000 төгрөг гэж заасан харагдана. Ямар ч байсан ХХААХҮ-ийн сайд Х.Болорчулууны хувьд эсэргүүцэл өндөр байсан ч хамаагүй ажлаа урагшлуулахаар шийдсэн нь илэрхий байна. Хэрэв 5.5 сая үхэр сүргийг нэг бүрийг 2000 төгрөгөөр ээмэгжүүлбэл 11 тэрбум төгрөг болох юм.