Ирэх сарын 29-ний өдөр болох Монгол Улсын Их Хурлын гишүүдийг сонгуульд өрсөлдөх нэр дэвшигчид тун удахгүй буюу энэ сарын 13-ны өдөр тодрох гэж байна. Энүүхэн хооронд УИХ-ын суудалд горилогчид бүгд сандралдан гүйлдэж буй нь мэдээж. Тэднээс гадна намын чансаагаар дээд сэнтийд залрах жагсаалтанд багтахыг эрмэлзэгчид одоогийн УИХ-ын гишүүд, нэр дэвшихээр өргөдлөө өгөгсөд, бас бус хүмүүсийн дунд хутгалдан гүйлдэж байгаа нь худал биш болох биз. Гэхдээ МУ-ын Ерөнхий сайд, МАН-ын дарга Л.Оюун-Эрдэнэ өнөөгийн УИХ-ын гишүүдийг “Тойрог, тойрогтоо очиж өрсөлд. Жагсаалтанд мэргэжлийн хүмүүсийг оруулна!” гэж зарласан нь зарим хүний горьдлогыг тас цавчиж орхисон.

Яг энэ түйвээний дундуур нэгэн хүний нэр огцом цавчиж орж ирсэн нь “Эрдэнэт үйлдвэр”-ийн дарга Г.Ёндон. “Монголросцветмет”ТӨҮГ-т орлогч захирлын албан тушаалтай асан түүнийг МУ-ын Ерөнхийлөгч У.Хүрэлсүхийн дотны анд гэдгийг түмэн мэднэ. “Г.Ёндон жагсаалтанд багтжээ” гэх энэ нууц яриа Эрдэнэт үйлдвэрийн ажилчид, удирдлагуудын дунд тархаж, Эрдэнэт хот даяраа шуугиж байна шүү, цаана чинь! МАН үнэмлэхүй засаглаж буй энэ цагт томчууд нь дараагийн УИХ-ын гишүүдийн жагсаалтыг дан танил тал, анд нөхөд, цүнх баригчид, хамаатан саднаараа хэдийнэ бүрдүүлчихсэн юм биш биз?!

Уул уурхайг “халаасалж” явсан тэр хүн найзынхаа халаасаар дамжаад баараггүй гишүүн болгодог жагсаалтанд багтчихсан юм биш биз?!  Арай үгүй байлгүй дээ!

Бид энэ талаар болон “Эрдэнэт үйлдвэр”-ийн бусад асуудлаар мэдээ сэлт цуглуулж, үргэлжлүүлэн дэлгэрэнгүй мэдээлнэ.