Ирэх долоо хоногийн лхагва гарагт УИХ-ын Хаврын ээлжит чуулган нээлтээ хийнэ. Энэ чуулганаар яригдах сонин содон зүйлс одооноос анхаарал татаад эхэллээ. Бүрэн эрхээсээ чөлөөлөгдөх өргөдлөө өгчихөөд байгаа УИХ-ын Төрийн байгуулалтын байнгын хорооны дарга Ж.Мөнхбат, ХНХ-ын сайд, УИХ-ын гишүүн Т.Аюурсайхан нарын асуудал орж ирнэ. Үүнтэй зэрэгцээд нэр бүхий 7-н УИХ-ын гишүүнийг нүүрсний хэрэгтэй холбогдуулан бүрэн эрхээс нь түдгэлзүүлж шалгах саналаа прокурорын байгууллага бэлдчихээд байгаа тухай ч мэдээлэл бий. Энэ бол бүгдээрээ олны анхааралд орчихсон зүйл.

Харин олны анхааралд төдийлөн ороогүй боловч дагаад нэлээд олон асуулт үлдээх зүйл бол Монголбанкны ерөнхийлөгч Б.Лхагвасүрэнг Хаврын чуулганаар албан тушаалаас нь чөлөөлөх асуудлыг оруулж ирэх тухай юм. Б.Лхагвасүрэнг чөлөөлөх тухай мэдээ шинэ юм биш боловч бүдгэрчихээд байлаа. Бараг жил гаруйн өмнөөс л инфляц, валютын өсөлттэй холбоотойгоор чөлөөлөх тухай яригдсан.

Тухайн үед эдийн засгийн бүх хүндрэлийг цар тахал руу чихээд, Ерөнхий сайдын хамгаалалт дунд гал дараад өнгөрөөж байлаа. Тэгвэл сүүлийн үед түүнийг Хөгжлийн банкны ТУЗ-ийн гишүүнээр ажиллаж байхдаа “Бэрэн групп”-д зээл олгосон хэрэгт нь прокуророос яллах дүгнэлт үйлдэж, шүүхэд шилжүүлсэн тухай мэдээлэл гарах болсон. Хэргийг ирэх сард хэлэлцэх бөгөөд хилийн хориг тавьчихсан байгаа аж. Хилийн хоригтой Монголбанкны ерөнхийлөгч ажил үүргээ хэвийн явуулж чадах уу гэдэг өөрөө бас асуулт юм.

Монголбанкны ерөнхийлөгчийн албан тушаалаас Н.Баяртсайханыг чөлөөлөхөд дэд ерөнхийлөгчөөр ажиллаж байгаад албан тушаал ахисан Б.Лхагвасүрэн бараг томилогдсон өдрөөсөө түр зуурын хүн гэж харагдаж эхэлсэн. Шил шилээ дагасан дээр дурдсан шалтгаанууд ч дагалдсаар Төрийн ордноор “Хаврын чуулган нээгээд Монголбанкны ерөнхийлөгч Б.Лхагвасүрэнг чөлөөлнө” гэдэг шуум тартлаа даамжирчээ. УИХ-ын дарга, Ерөнхий сайдаас эхлээд өндөр албан тушаалтнууд ч түүнд урьдын адил талтай хандахаа байж, илт шүүмжлэх болсон аж. Зарим эх сурвалжууд Б.Лхагвасүрэн өөрөө огцрох өргөдлөө өгөхөөр зэхэж буй талаар ч мэдээлж эхлэв. Ямартаа ч түүнийг чөлөөлөх бүрэн эрх нь УИХ-д хадгалагдаж буй юм.