“Алтан тариа” компанийн эзэн П.Цэнгүүн ШӨХТГ-аас торгууль тавьсан гэдэг шалтгаанаар гурилынхаа үнийг 20 төгрөгөөр нэмж буйгаа мэдэгдсэн нь олныг бухимдуулаад байгаа. Тэгвэл үүнтэй зэрэгцэн “Дорнод гурил”-ын үүсгэн байгуулагч ХХААХҮ-ийн сайд Х.Болорчулуун дотоодод үйлдвэрлэсэн гурилыг НӨАТ-аас чөлөөлсөн гэдгийг зарлав. Ер нь гурилын үйлдвэртэй Х.Болорчулуун сайд болсноор гурилын үнэ хамгийн багадаа 50 хувиар өссөн гэдэг тоо мэдээлэл бий. Түүнийг сайд болохтой зэрэгцэн Монголын гурил үйлдвэрлэгчдийн холбооноос мэдээлэл хийж “Гурилын үнийг 50 хувь өсгөхөөс өөр аргагүй боллоо” гэж мэдэгдэж байлаа. Үр дүнд нь зарим зэрэглэлийн гурилын үнэ ганцхан жилийн дотор 70-80 хувиар өссөн. 2022 оны гуравдугаар сард гурил 1 кг нь 1499₮ байсан бол 2023 оны гуравдугаар сард 2569₮ болж өссөн байна.

Ийнхүү ашиг сонирхлын зөрчилтэй сайдын үед гурилын үйлдвэрүүд дур зоргоороо үнээ нэмээд зогсохгүй татварын хөнгөлөлт эдлээд амжлаа. Учир нь Зүүн бүсийг гурилаар хангадаг “Дорнод гурил” компанийг өнөөгийн ХХААХҮ-ийн сайд Х.Болорчулуун үүсгэн байгуулж, 1997-2012 он хүртэл захирлаар нь ажиллаж байсан юм. Харин УИХ-ын гишүүн болсноос нь хойш өнөөг хүртэл хүүхдүүд нь ажиллуулж байгаа гэдэг баттай мэдээлэл бий.