Ерөнхийлөгч асан Х.Баттулгын зохион байгуулалттайгаар нийт монголчуудыг “Хятадын заналхийллээс” айлган чичрүүлэх зорилготой “100 чухал сэдэв” нэвтрүүлгийн “Тусгаар тогтнол” хэмээх айхавтар нэвтрүүлэг өдгөөгөөс арван жилийн тэртээ телевиз, нийгмийн сүлжээгээр тарсан. Тусгаар тогтнолоо хамгаалахын тулд урд хөршийн стандарт бүхий нарийн царигтай төмөр зам барихыг эсэргүүцэж, эх нутгаа хамгаалж, эрлийз хурлийзууд, тагнуул туршуулуудын “нүдийг ухаж, тархийг нь хага цохих”-ыг эх оронч иргэн бүрдээ уриалж байв аа гэж…

Нарийн царигтай төмөр зам тавьчихвал л баахан хятад танкаа галт тэргэнд ачиж орж, ирээд түйвээж гарах юм байх, тэр нэвтрүүлэгт өгүүлж буйгаар. Орос Украинаас Крымийг булааж авсан дайн ид өрнөж асан тэр цагт дээрх шалтаг нь үнэнхүү бодит мэт санагдаж, нээрэн л хятадууд танкаа ачиж ирээд манай улсыг эзэлчих юм шиг зүрхэнд шар ус хуруулж асан сан. Гэтэл бодит байдал дээр өөр байна. Тэр хар л даа, уржигдархан/2024-05-06/ баахан дугуйтай танк ачсан вагон Монгол, Хятадын хилээр хээв ч үгүй давхиад л ороод ирнэ билээ. Сошиалаар бичлэг нь зөндөө яваа. Өргөн царигтай, цариггүй танкаа ачаад л дайраад ороод ирэх нь, ум аа хум. “Талын түнш-2024” цэргийн хээрийн сургуулилтын хүрээнд тийм цуваа дахиад хоёр ч ирж ирнэ.

Нүүрсээ Хятадын асар том зах зээлд нийлүүлж, улмаар далайн тээврээр бүр хол хилийн чанадад аваачиж, хэдэн ногоон олох гэсэн биш тусдаа ашиг сонирхолтой хэдэн нөхөр ууттай элс хадаасаар цоолж, долоо найман нүхээр савируулан байж, улс орны их бүтээн байгуулалт, ирээдүйн эдийн засгийн ашгийг хамтад нь салхинд хийсгэсэн дээ, зайлуул! Хувийн бизнесийн төслөө цааш нь түлхэхийн тулд, хөөрхий манай хэдийн бор зүрхийг түг, түгхийтэл айлгаж байгаад Ерөнхийлөгчийн сэнтийд ч залраад амжсан тэр нэгнийг шүтэн бишрэгчид одоо ч бий. Саяхан даа, Улаанбаатар хотын метрог Богд уулын урдуур тавих саналыг дэвшүүлчихсэн л давхиж явсан нь цаагуураа Майдар хот гэх хэл амтай төсөлтэй нь холбоотой ч юм шиг.

Танк өргөн царигаар орж ирэхийг хараад “Танк нь ч ороод ирчихлээ. Одоо Х.Баттулга маань яах юм бол доо?!” гэж өөрийн эрхгүй бодогдов. Яах юу байх вэ?! Энэ жилийн сонгуулиар дахин эрх мэдэлд хүрэхээр өөрийн хүмүүсээ наагуур, цаагуур шургуулах санаатай эв нэгдэлгүй, шударга ёсгүй, ардчилалгүй Ардчилсан намынхаа ан цавыг улам ангайлгаж яваа хүн дээ!