Хэд хэдэн компани байгуулж, амжилтанд хүргэж зараад зуу, зуун сая долларын хөрөнгөтэй болсон "BuckFeather" спорт барааны дэлгүүрийн эзэн, 42 настай Метт Басбайсад сар гаруйхны өмнө ер бусын гайхалтай явдал тохиолджээ. М.Басбайсыг өглөө унтаж байхад галын дохиолол дуугаргаж, сандарган орноос нь босгов. Гал гарлаа хэмээн айсандаа унтлагын хувцастай, арзайж сэгсийсэн үстэй залуу нүүрээ ч угааж амжилгүй амиа аврахаар гадагшаа гарчээ. Гэтэл галын түгшүүр хуурамч болох нь мэдэгдсэнээр нэгэнт босчихсон М.Басбайс кофе авч уухаар ойролцоох кофе шоп руу алхжээ. Кофе шопын үүдэнд ирээд өглөөний мөргөлөө үйлдээгүйгээ санасан тэр буланд сууж, залбирч дуусаад нүдээ нээтэл өөртэй нь ойролцоо өндөртэй нэг хүү нударгаа зангидчихсан дөхөж ирэхийг нь хараад биеэ хамгаалахаар бэлдтэл өнөөх хүү алгаа нээж, “Та орон гэргүй хүн юм шиг байна. Энэ нэг долларыг ав!” гээд өгчээ. Өөрийнх нь яриагаар хүн төрөлхтний сайхан сэтгэлд илтгэл алдраад байсан Метт Басбайс эл явдалд итгэж ядан байснаа хэвлэлд нь ярьжээ. Жаал хүүгийн нэг долларт сэтгэл нь хөдөлсөн залуу өглөгч хүүг дагуулан хамтдаа өглөөний цай ууж, аавтай нь холбоо барьж, байнга холбоотой байхаа илэрхийлсэн байна. Мөн сэтгэл нь хөдөлсөн бизнесмен залуу аав, хүү хоёрыг Луйзанагийн Батон Ружэд байх дэлгүүр дээрээ аваачин 40 секундэд багтаан дуртай бараагаа авахыг зөвшөөрчээ. Өглөгч хүү энэ хугацаанд амжуулан мөрөөдөж явдаг унадаг дугуй, өөр олон спорт хувцас, хэрэглэл авсан байна. Өгөөмөр сэтгэлтэй Эллис есөн настай бөгөөд онц дүн авсан гэж шагнуулсан нэг доллараа гудамжны хүнийг өрөвдсөндөө өгсөн нь тэр байжээ.