АНУ-ын Калифорни муж өнгөрсөн долоо хоногийн бямба гарагт сэргээгдэх эрчим хүчийг есөн цаг гаруй ашигласан байна. Нарийвчлан хэлэхэд, тус мужийн 39 сая иргэн дээрх хугацаанд усанд орох, угаалга хийх, цахилгаан зуух ажиллуулах, цахилгаан машинаа цэнэглэх гээд өдөр тутмын бүхий л үйл ажиллагаандаа 100% сэргээгдэх эрчим хүч ашиглажээ. Дараа өдөр нь ч мөн адил хатуу түлшгүйгээр эрчим хүчнийхээ хэрэглээг найман цагийн турш цэвэр эрчим хүчээр хангаж, ирээдүйд сэргээгдэх эрчим хүч ашигладаг болох эхний шатны туршилтуудыг амжилттай явууллаа гэж Калифорни мужийн эрчим хүчний газраас мэдээллээ. Ийнхүү нар, салхи, ус, газрын дулаанаар цэнэглэдэг цахилгаан сүлжээний туршилтыг ес хоног дарааллан явуулахад хамгийн удаан нь 9.25 цаг болж, дээд амжилт тогтоосон гэв. Зарим өдөр ердөө 15 минут л цэвэр цахилгаан хэрэглэсэн бол ес хоногийн дундаж цаг 390 минут орчим байжээ.