Их Британи, Умард Ирландын нэгдсэн Вант улсын Гадаад харилцааны сайд Лорд Девид Камерон Монгол Улсад айлчлах болсныг тус улсын “The Standard” сэтгүүл мэдээллээ. Тэрбээр Тажикистан, Киргизстан, Узбекистан, Туркменистан, Казахстан гэсэн Төв Азийн таван орон, мөн Монгол Улсад айлчлах юм байна.

Энэ удаагийн айлчлалын зорилго нь Их Британитай бизнесийн харилцааг хөгжүүлэхэд чиглэж байна. Түүнчлэн Их Британийн хэвлэлүүд ОХУ-д тавьсан худалдааны хориг арга хэмжээ Оростой хиллэдэг улс орнуудад сөргөөр нөлөөлөх цаашлаад Их Британитай харилцаа тасалдах хандлага байгаа тул цаашдын харилцааг сайжруулах зорилгоор айлчилж байгаа гэж мэдээлжээ.
Их Британийн Гадаад харилцааны яамны албан мэдээлэлд “Энэ удаагийн айлчлалаар хориг арга хэмжээг давж гарах, хүний эрхийн чиглэлээр шат ахиулах талаар бүс нутгийн удирдагчидтай хэлэлцээ хийнэ” гэдгийг дурджээ.

Их Британийн Гадаад харилцааны яам гадаад оюутны тэтгэлгийн санхүүжилтийг хоёр дахин нэмэгдүүлж, хөгжлийн хөтөлбөрийн зардлыг нэмэгдүүлнэ гэдгээ зарлаад байгаа. Мөн Төв АЗийн улс орнуудын багш солилцооны хөтөлбөрийг үр дүнтэй болгох, тэтгэлэг зарлана гэдгээ ч зарлаад байгаа юм. Айлчлалын үеэр Тажикийн усан цахилгаан станцын төсөл, Киргизий усалгааны талбай зэрэгтэй танилцахаар болжээ.