Украинийн Ерөнхийлөгч Володимир Зеленскийн амь насанд халдах хуйвалдаанд ОХУ-ын талтай хамтран ажилласан гэх этгээдийг баривчилсан талаар Польшийн эрх баригчид мэдээлэв. Прокуроруудын мэдээлснээр Павел К гэх Польшийн иргэн нь В.Зеленскийн дамжин өнгөрч байсан нисэх онгоцны буудлын талаарх мэдээллийг цуглуулж байсан байна. Мөн баривчлах ажиллагааг Украинийн тагнуулынхны өгсөн мэдээлэлд үндэслэн зохион байгуулсан гэлээ. Гэхдээ баривчлагдсан сэжигтэн нууцын зэрэглэлтэй мэдээлэл цааш дамжуулсан эсэхийг тодорхой мэдээлсэнгүй. Сэжигтэнг саатуулан байцааж байгаа бөгөөд гэм буруутай нь нотлогдох юм бол найман жилийн хорих ялаар шийтгэх аж. Павел К гэгч этгээд нь ОХУ-ын цэргийн тагнуулынхантай холбоо барьж, хамтран ажиллах санал тавьсан нь эхний шатны мөрдөн байцаалтын явцад тодорхой болсон гэнэ.