ОХУ-ын Ерөнхийлөгч Владимир Путин Ирантай 20 жилийн турш стратегийн түншлэлд шилжих гэрээнд гарын үсэг зурлаа. Одоо уг гэрээг Төрийн Думаар соёрхон батлах үлдээд байна.

Орос-Украины цэрэг дайны ажиллагаа эхэлснээс хойш Ираны талыг ОХУ-д нисгэгчгүй дрон зэрэг зэвсэглэлийн гол ханган нийлүүлэгч гэж барууны улс орнууд шүүмжилсээр ирсэн юм. Нийт 47 зүйл заалт бүхий энэхүү гэрээний гуравны нэг орчим нь цэрэг-техникийн хамтын ажиллагаа, олон улсын аюулгүй байдалтай холбоотой байна. Хамгийн онцлууштай нэг заалт нь гэрээний хэрэгжих хугацаанд хоёр талын аль нэгний газар нутгийн бүрэн бүтэн байдал, тусгаар тогтнолд халдсан тохиолдолд харилцан бие, биенээ хамгаалах тухай тусгажээ.

Гэвч Иран болон ОХУ-ын аль, аль нь үүнийг цэргийн эвслийн гэрээ биш гэж мэдэгдсээр байна.  Гэрээнд тусгаснаар худалдаа, эдийн засаг, цөмийн эрчим хүч, эрүүл мэнд, боловсрол, сансар судлалын салбарт хамтран ажиллах талаар тусгажээ. ОХУ-ын Ерөнхийлөгч Влалимир Путин энэхүү гэрээг Иран, Оросын харилцааны түүхэн шинэ бөгөөд чухал алхам гэдгийг тодотгосон байна.

Ираны Дээд удирдагч Аяатолла Али Хаменей ОХУ-ын Ерөнхийлөгчид илгээсэн захидалдаа “Иран улс АНУ-тай харилцаагаа сэргээх аливаа алхамаас үл хамааран Тегераны зүгээс Москватай нягт харилцаатай байх болно” гэдгийг цохон тэмдэглэсэн юм.