Мэргэжлийн сүмогийн 64 дэх ёкозүна Акэбоно Таро 54 насандаа Токио хотноо нас баржээ. Тэрбээр энэ сарын эхээр зүрхний өвчний улмаас Токиогийн эмнэлэгт хэвтэн эмчлүүлж байгаад ийнхүү зүрхний архаг дутагдлын улмаас нас барсан байна.

Тэрбээр 1969 оны тавдугаар сарын 8-нд Хавайн арлын Хонолулу хотын захад байх Вайманало гэх хөдөөгийн тосгонд төрж, 1980-аад оны сүүлээр Японд нүүн, мэргэжлийн сүмод хөл тавьсан юм. Анх 1988 оны гуравдугаар сард барилдаж эхэлсэн Акэбоно  1992 оны тавдугаар сард анхны түрүүгээ хүртэж, 1993 оны нэгдүгээр сард ёкозүна цолны болзол хангажээ. Тэрбээр Японы мэргэжлийн сүмо бөхийн аварга цолд хүрсэн анхны гадаад бөх болж түүхэнд үлдсэн юм.

Акэбоно Таро мэргэжлийн сүмо бөхийн замналдаа дээд зиндаанд 11 удаа түрүүлсэн юм. Мэргэжлийн сүмогоос зодог тайлсны дараа Японы мэргэжлийн бөх нэртэй холимог тулааны рингэнд гарч зургаан удаа төрөл бүрдээ аваргалсан юм.

АНУ-аас Япон улсад суугаа Элчин сайд Рам Эмануэль эмгэнэл илэрхийлж “Хавайн арлын бахархалт хөвгүүн, Америк-Япон соёлын харилцааны гүүр болсон эрхэм хүн нас барсанд гүнээ харамсаж байна” гэж твиттер хуудаснаа нийтэлжээ.