ОХУ-ын Ерөнхийлөгч Владимир Путин Украины байлдааны ажиллагааг Оросууд санаачлаагүй гэдгийг онцлоод 2014 онд Украинд барууны оролцоо бүхий төрийн эргэлтийн дараа энэ бүхэн эхэлсэн гэдгийг цохон тэмдэглэжээ. ОХУ-ын Ерөнхийлөгч “Ясен-М” ангиллын цөмийн шумбагч онгоцны алба хаагчидтай уулзах үеэрээ ийнхүү мэдэгдсэн байна.

Тэрбээр хэлэхдээ “Бид энэ тулааныг эхлүүлж, санаачлаагүй. Барууны улс орнуудын дэмжлэгтэйгээр 2014 онд Украинд болсон төрийн эргэлтийн дараа л энэ бүхэн эхэлсэн. ОХУ найман жилийн турш Украины асуудлыг энхийн замаар зохицуулахыг хичээж ирсэн” гэсэн байна.

ОХУ-ын арми Украины газар нутагт 2022 оны хоёрдугаар сард цэрэг оруулснаас хойш ОХУ-ын Ерөнхийлөгч ийм байр суурь илэрхийлсээр байгаа юм. Түүнчлэн тэрбээр “Украины дотоодод неонацист үзэл асар нөлөөтэй” гэдгийг цохон тэмдэглэсэн байна. ОХУ-ын засаг захиргаа Украинтай хийх энхийн хэлэлцээг үр дүнд хүргэж, бүр мөсөн энх тайван тогтооё гэвэл ОХУ-ын ашиг сонирхлыг дээдлэх ёстой гэдгийг удаа дараа мэдэгдсээр байгаа билээ.