Албанийн Засгийн газрын ээлжит хуралдаанаар нийгмийн сүлжээний “ТикТок” аппыг 12 сарын хугацаатай хаах шийдвэр гаргасан байна. Энэ долоо хоногтоо багтаж Албанийн нутаг дэвсгэрээс “ТикТок”-г татах боломжгүй болгох аж. Өнгөрсөн жил Албанид өсвөр насны нэгэн хүүхдийг “ТикТок”-оор танилцсан этгээд хороосон хэрэг гарсан нь эрх баригчдыг уг платформыг хянах, хязгаарлах талаар үг үйлдэл гаргахад хүргэсэн юм.

Одоогоор Албанийн Засгийн газрын шийдвэр хэр зэрэг үр дүнд хүрэх нь тодорхойгүй байна. Учир нь дээрхтэй адил шийдвэр гаргасан улс орнуудад технологийн мэдлэгтэй хэрэглэгчид өөр эх үүсвэрээр татаж, хэрэглээ нь зогсохгүй байх нь элбэг байсан юм. Эрх баригчдын шийдвэрийг Ардчилсан намын хэд, хэдэн гишүүд үг хэлэх, үзэл бодлоо илэрхийлэх эрх чөлөөнд халдсан үйлдэл гэж шүүмжилсээр байна. Өнгөрсөн оны сүүлээр Албанийн Засгийн газар “ТикТок”-г хаахаар зэхэж байсан ч олон нийтийн эсэргүүцэлтэй тулан хойшлуулж байсан билээ.