Энэ үзэгдэл өнөөдөр/2024-04-08/ тохиох гэж байгаа билээ. Нар бүтэн хиртэх талаар хэдэн сарын өмнөөс ярьж, дэлхий даяар анхаарлын төвд орж, эл өдрийг сая, сая хүн хүлээж буй юм. Нар хиртэх үзэгдэлтэй холбоотойгоор олон янзын мэдээлэл гарч байгаагаас Х платформд нэгэн жиргээчний асуултанд өгсөн НАСА-гийн хариулт та бүхэнд анхаарууштай зөвлөгөөг өгсөн байна.

Маркес Браунли гэх ютүбер залуугийн нар хиртэх үеэр гар утасныхаа камерийг нар руу чиглүүлэх, зураг авах, дүрс бичлэг хийхэд аюултай эсэхийг лавлахад НАСА дараах байдлаар хариулжээ. НАСА-гийн өндөр чанартай зураг боловсруулдаг багийнхны тайлбарласнаар нар хиртэх үед гар утасныхаа камерийг нар руу чиглүүлснээр мэдрэгч төхөөрөмж нь шатах аюултай. Тэр тусмаа нэмэлт дуран, томруулагч шил залгасан үед ямар ч төрлийн гар утасны камер ажиллагаагүй болох эрсдэлтэй аж.

Харин гэрлийн шүүлтүүр төхөөрөмж эсвэл зориулалтын хар хальс бүхий нар хиртэх үзэгдлийг ажиглах нүдний шилийг гар утасныхаа камерийн өмнө баривал мэдрэгч нь шатахаас бүрэн хамгаална.

Энэ удаагийн нар бүтэн хиртэх үзэгдэл нь Хойд Америк даяар хамгийн тод ажиглагдана. Дараагийн нар хиртэх үзэгдэл 2026 онд тохиож, Атлантын далайд илүү тод ажиглагдах юм байна.