НҮБ-ын хүний эрхийн байгууллага өнгөрөгч лхагва гарагт Бангладешт өнгөрсөн оны зуны болсон үймээний талаарх нэгтгэсэн мэдээлэл танилцуулжээ. Тухайн үеийн Ерөнхий сайдыг түлхэн унагасан бослого буюу 2024 оны долоодугаар сарын 15-наас наймдугаар сарын 05-ны хооронд үргэлжилсэн эмх замбараагүй байдлын улмаас 1,400 хүн амиа алдсан аж.

Женевт төвтэй НҮБ-ын Хүний эрхийн байгууллагын гаргасан шинэ тайланд онцолсноор орон нутгийн аюулгүй байдал болон тагнуулын албад хүний эрхэнд системтэйгээр халдсан тул хүн төрөлхтний эсрэг гэмт хэрэгт тооцож, нэмэлт мөрдөн шалгах ажиллагаа явуулах шаардлагатай гэжээ.

Олон эх сурвалжийн өгсөн мэдээгээр хуучин Ерөнхий сайд Шейх Хасина Энэтхэг рүү зугтах хүртэл гурван долоо хоногийн хугацаанд амиа алдсан энгийн иргэд 1,400 гэсэн нь одоогоор мэдэгдэж буй тоо. Хэрэв нэмэлт мөрдөн шалгах ажиллагаа явуулбал энэ тоо өсөх нь дамжиггүй гэв. Эхний ээлжийн шалгалтаар амиа алдсан иргэдийг тусгай албадынхан буудан хороосон нь нотлогдоод байгаа юм байна.

Амиа алдагсдаас гадна 11,700 хүнийг барьж хорьсон нь орон нутгийн аюулгүй байдлын албаныхны өгсөн мэдээгээр тодорхой болоод байгаа юм байна.