AKIPRESS.COM – Нээлттэй засаглалын түншлэл Ази, Номхон далайн бүсийн уулзалт энэ сарын 05-07-нд Филиппин улсад болсон. Энэ үеэр Монгол Улсын Сонгуулийн ерөнхий хорооны Ажлын хэсгийн дарга Д.Бат-Эрдэнэ, Гадаад харилцаа, хамтын ажиллагааны мэргэжилтэн Б.Уянга нар сайд нарын түвшний зөвлөлгөөн, ярилцлага, уулзалтуудад оролцож, сонгуулийн хуулийн шинэчлэлийн талаар танилцуулж, туршлага солилцсон байна.

Монгол Улсын Сонгуулийн ерөнхий хороо нь Нээлттэй засаглалын түншлэлээс санаачлан шинээр байгуулсан Улс төрийн санхүүгийн өгөгдөл хэвлэх онлайн платформд нэгдсэн Азийн анхны улс болжээ. Нээлттэй засаглалын түншлэлийн хянан шалгах хорооныхон МУ-ын СЕХ-ны санаачилгыг хянаж үзээд санхүүгийн ил тод байдлыг хангах цахим платформд албан ёсоор элссэний батламж гардуулжээ.

Энэ онд зохион байгуулсан Нээлттэй засаглалын түншлэл Ази, Номхон далайн бүсийн уулзалтанд тус бүс нутгийн засгийн газар, иргэний нийгэмлэг, олон улсын байгууллагын 800 гаруй төлөөлөгч оролцож, ардчилалыг бэхжүүлэх, ил тод байдлыг нэмэгдүүлэх, засаглалын итгэлцлийг сайжруулах, бүс нутгийн хэмжээнд засгийн газруудын санаачлагыг улам нээлттэй, ил тод болгоход тулгарч буй саад, бэрхшээлийн талаар зөвлөлдсөн байна.