Орон нутгийн цагаар пүрэв гарагийн орой Мурманск мужийн Апатити хотын иргэдтэй уулзаж байх үеэр нэгэн этгээд тус мужийн амбан захирагч Андрей Чибисийн гэдсэн тус газар нь хутгалжээ. Түүнийг орон нутгийн эмнэлэгт хүргэж, яаралтай хагалгаанд орсон байна. Апатити хотын эмнэлгийн даргын хэлснээр түүний биеийн байдал хүнд байгаа аж. Халдлага үйлдсэн Александр Быданов гэгчийг газар дээр нь баривчилжээ. Баривчлах ажиллагааны явцад гэмт этгээд шархадсан гэж Телеграмын “База” суваг нийтэлсэн байна. Гэмт этгээд нь өдгөө 42 настай төмөр замын ажилтан бөгөөд сэтгэцийн ямар нэгэн эмгэггүй гэж цагдаагийн газраас мэдээлжээ.

Мурманск мужийн амбан захирагч Андрей Чибис 2019 оны 9-р сараас хойш энэ албыг хашиж байгаа нэгэн юм. Өмнө нь 2014-2019 оны хооронд ОХУ-ын Барилга байгууламжийн хяналтын газрын даргаар ажиллаж байжээ. Барууныхан түүнийг Путины хүрээллийн нэгэн, хууль бусаар хөрөнгөжсөн гэж үздэг. ОХУ-ын арми 2022 онд Украинд нэвтэрснээс хойш Европын холбоо, Их Британи, Швейцарь, АНУ, Австрали, Шинэ Зеланд улсууд хориг тавьж, хилээр нэвтрэхийг нь хоригложээ.