Хүнд метал хөгжмийн хамгийн алдартай төлөөлөгчдийн нэг Оззи Осборн Блек Саббат хамтлагтайгаа эргэн нэгдэж, сүүлчийн удаа тоглолт хийхээр болсон талаар түүний эхнэр Шерон Осборн зарлажээ. Алдарт рок хамтлагийн урлагийн тайзнаас зодог тайлах, өөрөөр хэлбэл үнэнч шүтэн бишрэгчидтэйгээ салах ёс хийх тоглолт ирэх долоодугаар сарын 05-нд Английн Бирмингамын Вилла Паркт болохоор тов гарчээ.

Хүнд метал хөгжмийн анхдагчид басхүү ноён оргил болсон Металлика, Пантера, Слейр, Гожира, Антракс хамтлагууд оролцох уг тоглолтын орлогыг сайн үйлсын аянд хандивлах юм байна. Блек Саббатын тухайд хамтлагийн анхны гишүүд болох Оззи Осборн, Тони Ломми, Жийзер Батлер, Билл Уорд нар 20 жилийн дараа бүрэн бүрэлдэхүүнээрээ цуглах гэж буйгаараа туйлын онцлогтой гэдгийг онцолжээ. Тэднээс гадна Билли Корган, Слаш, Фред Дёрст, Вольфанг Ван Халн, Том Морелло зэрэг домгууд ч хүрэлцэн ирэх аж.

О.Осборнын тухайд Паркинсоны өвчин нь хүндэрснээс гадна нурууны бэртлийн улмаас төрөл бүрийн арга хэмжээ, аялан тоглолтонд оролцох боломжгүй болсон ч гэлээ сүүлчийн тоглолтын өмнө тайзнаа гарч шүтэн бишрэгчдийнхээ өмнө богино хэмжээний тоглолт тавихаар төлөвлөсөн гэнэ. Эхнэр Шерон Осборнын хувьд нөхрийнхөө хамтлагийн “Эхлэл рүүгээ буцсан нь” нэртэй сүүлчийн тоглолтыг зохион байгуулах ажлыг гардан авсан бөгөөд 76 настай Оззигийн эцсийн тоглолт байх нь дамжиггүй юм хэмээн ВВС агентлагт ярьжээ.