АНУ-ын Нью-Жерси мужаас Конрессийн дээд танхимд сууж асан сенатч Боб Менендез нь авлига, хээл хахуулийн хэрэгт холбогдсоныг шүүхээр хэлэлцэж, эцэслэн шийджээ. ВВС агентлагийн дамжуулж буйгаар өнгөрсөн оны долоодугаар сард алт, бэлэн мөнгө, Мерседес-Бенц зэрэг тансаг зэрэглэлийн автомашин бэлгэнд авсаны хариуд гадаадын Засгийн газартай хуйвалдсан хэргээр гэм буруутай нь тогтоогдсон түүнд 11 жилийн хорих ял оноожээ. Прокурорууд 71 настай түүнийг нийт 16 зүйл ангиар буруутгаж, 15 жилийн хорих ял төлөвлөөд байсан ч олон нийтэд тустай хөдөлмөр эрхлүүлэхээр дүйцүүлэн ялыг хэмжээг багасган оноосон нь тэр аж. Менендезийн гэр бүл олон нийтэд нэлээд хүндтэй бөгөөд хүү Роб нь ардчилсан намаас сонгогдсон конгрессийн гишүүн, харин охин Алисиа нь MSNBC телевизийн мэдээний хөтлөгчөөр ажилладаг юм байна.

Боб Менендезээс гадна түүнд авлига өгсөн гэх Нью-Жерсигийн үл хөдлөх хөрөнгийн компанийн эзэн Фред Дайбес гэгчийг долоон жилээр хорьж, 1.75 сая ам.доллараар торгох ял оноожээ. Мөн Египет гаралтай америк бизнесмен Ваэль Хана гэгчийг Б.Менендез болон Египетийн Засгийн газрын хооронд зуучлагч хийсэн гэм буруутайд тооцож, найман жил хорьж, 1.25 сая ам.доллараар торгохоор ялласан байна.

Тэднээс гадна экс сенатчийн эхнэр Надин Менендезийг нөхрийнхөө хууль бус үйлдэд тусалсан, хамтран оролцсон хэмээн хэрэгт татсан боловч хорт хавдарын эмчилгээ хийлгэж байгаа тул шүүх хурлыг нь хойшлуулжээ. Гэхдээ тэрбээр прокуроруудын тулгасан гэмт хэрэгт ямар нэгэн байдлаар буруугүй гэж мэдүүлээд байгаа юм.