Украинийн талаас гэнэтийн сөрөг довтолгоо явуулсны хариуд ОХУ-ын Ерөнхийлөгч Владимир Путин шилдэг жанждынхаа нэгийг яаран дайны фронт руу илгээсэн байна. Оросын цэргийн блоггеруудын бичиж буйгаар украинчууд Курск мужийн Черкасское Поречноегоос Бердин хүртэл довтолгоо зохион байгуулж, орос цэргийн байрлал хүртэлх замыг цэвэрлэхээр мина устгагч техникүүдээ илгээсэн гэнэ. Энэхүү гэнэтийн сөрөг довтолгоонд цочсон В.Путин нөхцөл байдлыг гартаа авах зорилгоор ОХУ-ын шилдэг генералуудын нэг, Батлан хамгаалах яамны дэд сайд Юнус Бек Евкуровыг дайны халуун цэг рүү илгээжээ. Олон улсын хэвлэлүүдийн дамжуулснаар В.Путины хамгийн хайртай генералуудын нэгд ордог Юнус Бек Евруков нь өчигдөр өглөөний 10 цагт фронтын шугамд очиж, байлдааны ажиллагааг удирдаж эхэлсэн юм.

Харин ажиглагчдын үзэж буйгаар В.Путины дээрх шийдвэр нь АНУ-ын Ерөнхийлөгчид сонгогдоод байгаа Дональд Трампын шахалтаар найрамдлын гэрээ байгуулах ажил өрнөхөөс өмнө Украинийг нухчин дарах гэсэн зорилготой гэж тайлбарлаж болох юм. Нөгөөтэйгүүр, Киевээс зохион байгуулсан гэнэтийн сөрөг довтолгоо нь Володимир Зеленскийгийн төлөвлөсөн, Дональд Трампын сэтгэлийг хөдөлгөж, дайны санхүүжилт авах зорилготой үзүүлэх тоглолт гэж шүүмжлэх талууд ч бас байна.