Урд хөршийн өмнөд нутгийн Жухай хотын цэнгэлдэх хүрээлэнд олон тооны хүнийг автомашинаар дайрч амь хохироосон харамсалтай басхүү аймшигтай хэрэг гарсан. Орон нутгийн цагдаагийн газраас мэдээлснээр 62 настай Фөн гэгчийн үйлдсэн уг хэргийн улмаас 35 хүн амиа алдаж, 43 хүн гэмтэж, бэртээд байна. Хохирогчид бүгд биеийн тамираар хичээллэж байсан энгийн иргэд гэнэ.

Хэдийгээр олон улсын хэвлэлүүдээр энэ талаар мэдээлэл олонтаа гарч байгаа ч гадаадын сэтгүүлчдийг хэргийн газар руу нэвтрэхийг хатуу хориглосон гэж байна. Үүгээр ч зогсохгүй Хятадын олон нийтийн сүлжээгээр мэдээлэхийг ч бас хориглосон аж. Жишээлбэл, ВВС агентлагийн сэтгүүлчийг хэрэг гарсан цэнгэлдэх хүрээлэнгийн гаднаас мэдээлэл дамжуулах үеэр энгийн хувцастай хүмүүс ирж, олон янзын асуулт тавьж, тэндээс явахыг шаардан хөөсөн тохиолдол ч гарчээ. Ийм арга хэмжээ авсанд олон улсын хэвлэлүүд ихэд дургүйцэн БНХАУ-ын засаг төр ямар нэгэн үйл явдалд ямагт хаах, хорих арга хэмжээ авдагт шүүмжлэлтэй хандаж байна.

Жухай хотод энэ долоо хоногийн турш олон улсын агаарын нисэх хүчний үзэсгэлэн зохион байгуулж, аюулгүй байдлыг хангахын тулд харуул хамгаалалтаа чангатгаад байсан ч ийм харамсалтай хэрэг гарсанд БНХАУ-ын дарга Ши Жинпин эмгэнэл илэрхийлж, гэмтэж, бэртсэн хохирогчдыг эмчлэхэд бүхий л хүчин чармайлтаа дайчлахыг хотын эрүүл мэндийн байгууллагын удирдлагуудад даалгасан байна.

Ямартай ч орон нутгийн албаныхны мэдээлснээр Фөн гэгч нь эхнэрээсээ салахдаа хийсэн тохиролцоонд сэтгэл дундуур байсны улмаас бухимдан дээрх хэргийг үйлдсэн гэж тайлбарлаж байна.