Ерөнхий сайд Л.Оюун-Эрдэнэ БНХАУ-д айлчилж байгаа энэ цаг үед олон жил шийдлээ хүлээсэн хэд, хэдэн төсөл гараанаас гарах нөхцөл бүрдлээ. Тухайлбал БНХАУ-ын ЭкСим банкны тусгайлсан зээлийн хэлэлцээр байгуулж “Эрдэнэбүрэнгийн усан цахилгаан станц” төслийг санхүүжүүлэхээр боллоо.

Түүнчлэн БНХАУ-ын Засгийн газраас олгож буй нэг турам ам.долларын зээлийн ерөнхий хэлэлцээрээр нийт 11 төсөл санхүүжүүлэхээр төлөвлөж байна. Засгийн газар хороондын хэлэлцээр ёсоор эхний ээлжид 253 сая ам.долларын санхүүжилтийг шийдвэрлэж байгаа юм.

Харилцаа холбооны салбарын хүртээмж, чанар, хяналтыг сайжруулах төслийн санхүүжилтэд БНХАУ-ын ЭксИм банктай 20.9 сая ам.долларын тусгайлсан зээлийн хэлэлцээр байгуулжээ. Зээл нь жилийн тогтмол хоёр хувийн хүүтэй, 20 жилийн хугацаанд эргэн төлөх нөхцөлтэй бөгөөд эхний долоон жил үндсэн төлбөрөөс чөлөөлөгдөхөөр гэрээнд тусгажээ.  Энэ санхүүжилтээр холбооны шугам, сүлжээг шинэчлэх, сумдыг шилэн кабелиар холбох төслийг хэрэгжүүлнэ. Төслийн гүйцэтгэгчээр “Мэдээлэл холбооны сүлжээ” компани ажиллахаар байна.
Хамгийн чухал хэлэлцээ байгаа нь “Гашуунсухайт-Ганцмод” боомтын асуудал байлаа. Айлчлалын хүрээнд “Гашуунсухайт-Ганцмод боомтын хил дамнасан төмөр замын гүүрийг хамтран барих тухай Засгийн газар хоорондын хэлэлцээр” хүчин төгөлдөр болсон байна.

Энэхүү айлчлалыг Ройтерс агентлаг мэдээлэхдээ боомт холбох, ашигт малтмал, дэд бүтцийн бүтээн байгуулалтыг онцлон мэдээлсэн байна. Тус агентлаг БНХАУ-ын Төрийн зөвлөлийн Ерөнхий сайд Ли Цяны хэлснийг эш татан “БНХАУ Монгол хөрөнгө оруулахад мэргэшсэн аж нэгжүүдийг дэмжин, Хятадын компаниуд тогтвортой хөрөнгө оруулах бикнесийн орчин бий болно гэж найдаж байна” гэж мэдээлжээ.