Испани улсын хаан, хатан хоёр өнгөрсөн долоо хоногийн үерт хамгийн ихээр нэрвэгдсэн Валенсиа мужийн иргэдтэй уулзаж, сэтгэлийн дэм үзүүлэхээр Пайпорта хотод зочилжээ. Гэвч энэ үеэр уурлаж, бухимдсан иргэд дургүйцлээ илэрхийлэн тэдэн рүү шавар, чулуу нүүлгэж, хүндхэн байдалд оруулсан байна. Гамшигт нэрвэгдсэнээс хойш олигтой тусламж үзүүлээгүйд цөхрөнгөө барж, бухимдсан иргэдийн дайралтад өртөж, нүүр, хувцас нь нилэнхүйдээ шавар шавхай болсон Филип хаан, Летициа хатан хоёрыг харуулсан бичлэг онлайнд олон тоогоор нийтлэгджээ. Бичлэг дээр иргэд хааны гэр бүлд халдаж, тэдний дагалдан яваа бараа бологчдыг “алуурчин, шившиг” гэх зэргээр харааж зүхэж байв.

Бараа бологчдын бүрэлдэхүүнд багтсан Испанийн Ерөнхий сайд Педро Санчез, Валенсиа өөртөө засах мужийн Засгийн газрын тэргүүн Карлос Мазон нар нөхцөл байдал хүндрэх үед аюулгүй газар руу зугтсан ч ууртай иргэд Ерөнхий сайдыг нэхэн орилолдож байсан гэнэ. Гэхдээ тэд уг үймээний дараа олон нийтэд хандан хэлсэн үгэндээ хүндхэн байдалд орсон иргэдээ уурлаж, бухимдсаныг ойлгож байна. Гамшгийн үед харж хандах тал дээр хариуцлага алдсанд уучлаарай гэжээ.

Мөн хааны гэр бүлийнхэн Инстаграм дахь хуудсаараа дамжуулан мэдэгдэл хийж, үерийн гамшгийн дараах нөхцөл байдал тун хүнд байна. Ийм нөхцөлд арайхийн амь зууж буй иргэдийнхээ уур хилэнг ойлгож байна гэжээ. Пайпорта хотын захирагч Марибель Албалат мөн адил иргэдийнхээ сэтгэл зүйл байдал, цөхрөлийг ойлгож байгаа учир уучлалт гуйсан байна.

Испани улсад сүүлийн хэдэн арван жилд анх удаа ийм хүнд гамшиг тохиолдож, одоогийн байдлаар 200 гаруй хүн амиа алдаад байгаа юм байна. Гамшигт нэрвэгдсэн бүсүүдэд одоогийн байдлаар орон нутгийн аврах ангийнхнаас гадна 10,000 гаруй цэрэг, цагдаа, иргэний хамгааллын алба хаагчид эрэн хайх, аврах ажиллагаанд оролцож байгаа аж.