Хэдхэн хоногийн дараа болох АНУ-ын Ерөнхийлөгчийн сонгуулийн нэр дэвшигчдийн өрсөлдөөн хүчээ улам бүр авч дэлхий даяар танигдсан алдартнууд ч идэвхтэй оролцож байна. “Сонгуулийн өдөр”-ийн төлөөх энэхүү өрсөлдөөнд Холливуудын хамгийн сайхан бүсгүйн нэг, жүжигчин Скарлетт Йоханссон сонирхолтой байдлаар хувь нэмрээ оруулахаар шийдэж, Авенжерс багийнхныгаа цуглуулжээ. Түүний хувьд Ардчилсан намаас нэр дэвшигч Камала Харрисыг дэмжиж байгаа бөгөөд сонгогчдын сэтгэлийг татахын тулд ийм санаа сэдсэн байна.

Ингээд Бага Роберт Дауни, Дон Чийдль, Крис Эванс, Данай Гира, Марк Буффало нар С.Йоханссоны дуудлагыг хүлээн авч хамтрагчид болон сонгогчдыг сонгуульд идэвхтэй оролцохыг уриалсан байна. Бага Роберт Даунигийн Инстаграм хуудаст нийтэлсэн уг бичлэг дээр Авенжерсийн жүжигчид Вакандагийн уриа үгээс эш татан “Kamala Forever” гэж дуу нэгтэйгээр төгсгөжээ.