СпейсИкс, Тесла, Икс платформ зэргийг эзэмшдэг тэрбумтан Элон Маск анх АНУ-д хөл тавихдаа хууль бус ажилчин байсан гэнэ. Харин өнөөдөр тэр Бүгд найрамдах намын гол хандивлагч, Дональд Трампын талыг баримтлагч нэгэн болжээ. АНУ-ын Ерөнхийлөгч Жо Байден өнгөрсөн бямба гарагт “Дэлхийн хамгийн баян эр чинь анх энд ирэхдээ хууль бус ажилчин байсан юм шүү дээ” гэж ярьсныг Вашингтон Пост уламжилжээ. “Өвгөн” Ерөнхийлөгч цааш нь ярихдаа “Угтаа бол тэр оюутны визээр ирж, сургуульд сурах ёстой байсан юм. Даан ч тэгээгүй. Хууль зөрчсөн. Тэгсэн хэр нь “хууль бус” явдалын талаар ярьж суугаа нь хачин юм” гэж Элон Маскын цагаачлалын бодлого дээр харуулж буй хуурамч багийг хуу татаж хаяжээ.

Үүний дараа Вашингтон Постын сурвалжлагч нар Өмнөд Африк төрсөн гэх АНУ-ын иргэн Элон Маскын намтарыг судалж үзэхэд оюутны визээр хил давсан нь үнэн бөгөөд олон хүний туслалцаатайгаар ажил хийх зөвшөөрөл олж авсныг тогтоосон талаар ч мэдээлжээ.